Matthew Chapter 4 - Paipera Tapu 1868 | Te Paipera Tapu 1868

Matthew Chapter 4 - Paipera Tapu 1868

1
Me i reira ka arahina a Ihu e te Wairua ki te koraha, kia whakamatautauria e te rewera.
2
Ano ka wha tekau nga ra ka wha tekau nga po i noho puku ai, muri iho ka hiakai.
3
Na, ka tae mai te kai whakamatautau ki a ia, ka mea, Ki te mea ko koe te Tama a te Atua, kiia iho kia meinga enei kohatu hei taro.
4
Na, ka whakahokia atu e ia, a ka mea, Kua oti te tuhituhi, E kore e ora te tangata ki te taro kau, engari ki nga kupu katoa e puta mai ana i te mangai o te Atua.
5
Me i reira ka kawe te rewera i a ia ki te pa tapu, a whakaturia ana ia ki runga ki te keokeonga o te temepara,
6
A ka mea ki a ia, Ki te mea ko koe te Tama a te Atua, rere atu ki raro: kua oti hoki te tuhituhi, Ka korerotia iho koe e ia ki ana anahera; ma ratou koe e hiki ake ki o ratou ringaringa, kei tūtuki tou waewae ki te kohatu.
7
Mea atu ana a Ihu ki a ia, Ka oti ano hoki te tuhituhi, Kaua e whakamatautau ki te Ariki ki tou Atua.
8
Ka kawe ano hoki te rewera i a ia ki runga ki tetahi maunga tiketike rawa, a whakakitea katoatia ana ki a ia nga rangatiratanga o te ao, me te kororia o aua mea;
9
A mea mai ana ki a ia, Ko enei mea katoa e hoatu a ahau ki a koe, ki te tapapa iho koe ki te koropiko mai ki a au.
10
Na, ka mea a Ihu ki a ia, Haere atu, e Hatana; kua oti hoki te tuhituhi, Me koropiko koe ki te Ariki ki tou Atua; me mahi ano ki a ia anake.
11
Na, ka mahue ia i te rewera, a ka haere mai nga anahera ka mahi mea māna.
12
Ano ka rongo a Ihu kua tukua a Hoani ki te whare herehere, ka haere ia ki Kariri;
13
A ka mahue Nahareta i a ia, a haere ana, ka noho ki Kaperenauma, ki te taha o te moana, ki nga kaha o Hapurona o Nepetarima:
14
I rite ai ta Ihaia poropiti i korero ai, i mea ai,
15
Te whenua o Hapurona, me te whenua o Nepetarima, i te ara o te moana, i tera taha o Horano, Kariri o nga tauiwi,
16
Te hunga i noho i te pouri, kua kite ratou i te mārama nui; a ki te hunga i noho i te wahi me te ātārangi o te mate, kua puta ake te māramatanga ki a ratou.
17
No reira ano a Ihu i timata ai te kauwhau, te mea, Ripeneta, kua tata hoki te rangatiratanga o te rangi.
18
A i a Ihu e haere ana i te taha o te moana o Kariri, ka kite ia i nga tāngata tokorua, he tuakana, he teina, i a Haimona, ko tona ingoa nei ko Pita, raua ko tona teina ko Anaru, e maka ana i te kupenga ki te moana; he kai hao hoki raua.
19
Na, ka mea ia ki a raua, Arumia mai au, a maku korua e mea hei kai hao tangata.
20
A mahue ake i a raua nga kupenga, a aru ana i a ia.
21
A, tona haerenga atu i reira, tokorua atu āna i kite ai, he tua kana, he teina, ko Hemi tama a Heperi, raua ko tona teina ko Hoani, i te kaipuke i a Heperi i to raua matua, e ta ana i nga korenga o a ratou kupenga; a karangatia ana raua e ia.
22
Mahue tonu ake i a raua te kaipuke me to raua matua, a aru ana i a ia.
23
Na, ka haereerea katoatia Kariri e Ihu, whakaako ana i roto i o ratou whare karakia, kauwhau ana i te rongo pai o te rangatiratanga, me te whakaora i nga mate katoa me nga turorotanga katoa o te iwi.
24
A haere ana tona rongo puta noa i Hiria: a kawea mai ana e ratou ki a ia nga tāngata mate katoa e ngaua ana e te tini o nga mate, o nga mamae, me te hunga e nohoia ana e te rewera, me te hunga haurangi, me nga pararutiki; a whakaorangia ake ratou e ia.
25
A he tokomaha nga tāngata i aru i a ia i Kariri, i Rekaporihi, i Hiruharama, i Huria, i tera taha ano hoki o Horano.