Matthew Chapter 3 - Paipera Tapu 1868 | Te Paipera Tapu 1868

Matthew Chapter 3 - Paipera Tapu 1868

1
Na, i aua ra ka puta mai a Hoani Kai iriiri, ka kauwhau i te koraha o Huria,
2
Ka mea, Ripeneta, kua tata hoki te rangatiratanga o te rangi.
3
Ko ta Ihaia poropiti hoki tenei i korero ai, i mea ai, He reo no tetahi i te koraha a karanga ana, Whakapaia te huarahi o te Ariki, whakatikaia ona ara.
4
A te kakahu o taua Hoani he huruhuru kamera, he hiako hoki te whitiki o tona hope; a ko tana kai he mawhitiwhiti, he honi koraha.
5
Katahi ka haere atu ki a ia a Hiruharama, me Huria katoa, me nga kāinga katoa e tutata ana ki Horano,
6
A iriiria ana e ia ki Horano, me te whāki ano i o ratou hara.
7
A tona kitenga i te tini o nga Parihi me nga Haruki a haere mai ana ki tana iriiringa, ka mea ia ki a ratou, E te uri nakahi, na wai koutou i whakamahara kia rere i te riri meake puta mai?
8
Na, whakaputaia mai he hua e rite ana ki o te ripeneta.
9
A kei anga koutou, kei mea i roto i a koutou, Ko Aperahama to tatou matua: ko taku kupu hoki tenei ki a koutou, E ahei ana ano i te Atua te whakaara tamariki ake ma Aperahama i roto i enei kohatu.
10
Na, tenei ka pa te titaha ki te pakiaka o nga rakau: a ki te kahore tetahi rakau e hua i te hua pai, ka tuakina, ka makā ki te ahi.
11
Ko au nei, he iriiri taku i a koutou ki te wai, hei mea ripenetatanga: ko tenei ia e haere mai ana i muri i a au, nui atu tona mana i toku, e kore ahau e tau hei mau i ona hu: māna koutou e iriiri ki te Wairua Tapu me te kapura:
12
Ko tana mea tahi kei tona ringaringa, a e tino tahia e ia tana patunga witi, a e kohia ana witi ki roto ki te whare witi; tena ko te papapa a tahuna ki te kapura e kore a tineia.
13
I reira ka haere mai a Ihu i Kariri ki Horano ki a Hoani, kia iriiria e ia.
14
Otira ka whakakahore a Hoani ki a ia, ka mea, Ko te tikanga ra ko au kia iriiria e koe, a e haere mai ana koe ki a au?
15
Na, ka whakahokia mai e Ihu, a ka mea ki a ia, Tukua ra aianei; ko te tikanga hoki tenei ma taua kia whakarite i nga mea tika katoa. Na, tukua ana ia e ia.
16
Ano ka oti a Ihu te iriiri, tika tonu ake ia i te wai: na, ko te rangi ka tuwhera ki a ia, a ka kite ia i te Wairua o te Atua a heke iho ana me he kukupa, a tau ana ki runga ki a ia:
17
Na, ko tetahi reo no te rangi, e mea ana, Ko taku Tama tenei i aroha ai, ko taku i ahuareka atu ai.