- 1
- Na, i te mea kua whanau nei a Ihu i Pete-rehema o Huria, i nga ra o Kingi Herora, na, ka haere mai etahi Maki i te rawhiti ki Hiruharama,
- 2
- Ka mea, Kei hea tenei kua whanau nei hei kingi mo nga Hurai? i kite hoki matou i tana whetu i te rawhiti, a ka tae mai nei ki te koropiko ki a ia.
- 3
- A, te rongonga o Kingi Herora, ka ohorere ratou tahi ko Hiruharama katoa.
- 4
- Na, whakaminea katoatia ana e ia nga tohunga nui, me nga Karaipi o te iwi, a ka ui atu ki a ratou ki te wahi e whanau ai a te Karaiti.
- 5
- Ka mea mai ratou ki a ia, Ki Pete-rehema o Huria: ko ta te poropiti hoki tenei i tuhituhi ai,
- 6
- A ko koe, e Pete-rehema, whenua o Hura, ehara rawa i te iti rawa i roto i nga kawana o Hura: e puta mai hoki i a koe he kawana, hei hepara mo toku iwi mo Iharaira.
- 7
- Na, ka oti nga Maki te karanga puku e Herora, ka uia marietia ratou ki te wa i puta mai ai te whetu.
- 8
- A unga ana ratou e ia ki Pete-rehema, i mea ia, Haere, rapua marietia te tamaiti; a ka kitea, ka whakahoki mai i te korero ki a au, kia haere atu ai hoki ahau ki te koropiko ki a ia.
- 9
- Na, ka rongo ratou i ta te kingi, ka haere; na, ko te whetu i kite ai ratou i te rawhiti, e haere ana i mua i a ratou, a tae noa mai, tu noa ki runga ake i te takotoranga o te tamaiti.
- 10
- A, to ratou kitenga i te whetu, na, ko te tino haringa i hari ai.
- 11
- A ka tae ki roto ki te whare, ka kite i te tamaiti raua ko tona whaea ko Meri, na, tapapa iho ana ratou, koropiko ana ki a ia: ano ka mawhera o ratou taonga, ka hoatu etahi mea ki a ia, he koura, he parakihe, he maira.
- 12
- A i whakatupatoria ratou e te Atua, he mea moemoea, kia kaua e hoki ki a Herora, na, haere ana ki to ratou kāinga he ara ke.
- 13
- A ka riro atu ratou, na, ka puta moemoea mai tetahi anahera a te Ariki ki a Hohepa, ka mea, E ara, tangohia te tamaiti raua ko tona whaea, e rere ki Ihipa, a hei reira koe kia korero atu ra ano ahau ki a koe: meake hoki rapu a Herora i te tamaiti kia whakangaromia.
- 14
- Na, ka ara ia, ka mau ki te tamaiti raua ko tona whaea i te po, a haere ana ki Ihipa:
- 15
- A noho ana i reira, mate noa a Herora: na, ka rite ta te Ariki i korerotia e te poropiti, i mea ai ia, He mea karanga nāku taku tamaiti i Ihipa.
- 16
- A, te kitenga o Herora ka oti ia te tinihanga e nga Maki, rahi rawa tana riri, ka tono tangata atu, a patua iho nga tamariki katoa, nga mea e rua nei o ratou tau, me o muri iho, i Pete-rehema me nga wahi katoa o reira, he mea whakarite ki te taima i uia marietia atu e ia ki nga Maki.
- 17
- Katahi ka rite ta Heremaia poropiti i korero ai, i mea ai,
- 18
- I rangona he reo i Rama, he uhunga, he tangi, he aue nui, ko Rahera e tangi ana ki ana tamariki, a kihai i pai kia whakamarietia, no te mea kua kahore ratou.
- 19
- Ano ka mate a Herora, na, ka puta moemoea mai tetahi anahera a te Ariki ki a Hohepa ki Ihipa,
- 20
- Ka mea, Ara ake, tangohia te tamaiti raua ko tona whaea, a haere ki te whenua o Iharaira: kua mate hoki te hunga i whai kia patua te tamaiti.
- 21
- A tona aranga ake, ka mau ki te tamaiti raua ko tona whaea, ka haere ki te whenua o Iharaira.
- 22
- Otira ka rongo ia ko Arakarauha te kingi o Huria i muri iho i tona matua i a Herora, ka wehi ki te haere ki reira: otiia i whakamaharatia ia e te Atua, he mea moemoea, a haere ana ki nga wahi o Kariri;
- 23
- A ka tae mai ka noho ki tetahi pa, ko Nahareta te ingoa: i rite ai ta nga poropiti i mea ai, Me hua ia he tangata no Nahareta.
Address: 
Phone: 
Email: