Micah Chapter 4 - Paipera Tapu 1868 | Te Paipera Tapu 1868

Micah Chapter 4 - Paipera Tapu 1868

1
Na, tenei ake kei nga ra whakamutunga ka whakapumautia te maunga i to Ihowa whare ki te tihi o nga maunga, ka whakanekehia ake ano ki runga i nga pukepuke, a ka rere nga iwi ki reira.
2
Ka haere hoki nga iwi maha, ka mea, Haere mai, tatou ka haere ki runga ki te maunga o Ihowa, ki te whare o te Atua o Hakopa, kia whakaakona ai tatou ki ona ara, ka haere hoki tatou i ona huarahi: no te mea ka puta mai te ture i Hiona, me te kupu ano a Ihowa i Hiruharama.
3
He maha ano nga iwi e whakaritea e ia to ratou whakawa, ka riria ano hoki te he o nga iwi kaha i tawhiti; a ka patupatua e ratou a ratou hoari hei hea parau, a ratou tao hei tapahi manga; e kore tetahi iwi e hapai hoari ki tetahi iwi, a heoi ano ta ratou ako ki te whawhai.
4
Engari ka noho ratou, ia tangata, ia tangata, i raro i tana waina, i tana piki, tē ai he kai whakawehi; na te mangai hoki o Ihowa o nga mano te korero.
5
No te mea ka haere nga iwi katoa, tenei tangata, tenei tangata, i runga i te ingoa o tona Atua, me tatou ano hoki ka haere i runga i te ingoa o Ihowa o to tatou Atua, a ake ake ake.
6
I taua rangi, e ai ta Ihowa, ka huihuia mai e ahau te wahine e totitoti ana, ka whakaminea mai ano e ahau te wahine i peia atu, me ia ano i whakatupuria kinotia e ahau;
7
Ka meinga ano e ahau te wahine e totitoti ana hei morehu, te wahine makanga ano hoki hei iwi kaha: a ka kingi a Ihowa ki a ratou ki Maunga Hiona inaianei, a ake tonu atu.
8
Na, e koe, e te pourewa o te kahui, e te taumaihi o te tamahine o Hiona, ka tae mai ano ki a koe; ka tutuki mai ano te kingitanga tuatahi, ae ra, te kingitanga, ki te tamahine a Hiruharama.
9
Na, he aha koe i karanga nui ai? kahore ianei he kingi i roto i a koe? kua ngaro ranei to kai whakatakoto whakaaro? mau pu na hoki koe i te mamae me te mea he wahine e whanau ana.
10
Whakamamae, kia puta ki waho, e te tamahine o Hiona, kia rite koe ki te wahine e whanau ana: no te mea ko aianei koe puta ai i roto i te pa, ka noho ano hoki koe ki te parae, ka tae ano koe ki Papurona; ka whakaorangia koe i reira, ka hokona ano hoki koe i reira e Ihowa i roto i te ringaringa o o hoa riri.
11
Na, he maha nei nga iwi kua huihui ki te whawhai ki a koe, e mea ana, Whakapokea; kia titiro atu ano to tatou kanohi ki Hiona.
12
Otiia kahore ratou e mātau ki nga whakaaro o Ihowa, kahore ano hoki ratou e mohio ki tana i whakatakoto ai: ka kohikohia hoki ratou e ia ano he paihere ki te patunga witi.
13
Whakatika ki te patu witi, e te tamahine o Hiona: ka meinga hoki e ahau to haona hei rino, ka meinga ano e ahau o matikuku hei parahi, a he maha nga iwi e patua e koe a mongamonga noa; ka whakatapua ano hoki e ahau ma Ihowa nga mea i apohia mai e ratou, o ratou rawa ano hoki ma te Ariki o te whenua katoa.