- 1
- Na, huihui, e te tamahine a nga ropu kua oti tatou te whakapae e ia: ka patua e ratou te pāpāringa o te kai whakarite whakawa o Iharaira ki te rakau.
- 2
- Na, ko koe, e Pete-rehema Eperata, ahakoa he iti i roto i nga mano o Hura, e puta mai ano i roto i a koe tetahi maku hei kawana mo Iharaira: ona putanga atu no namata, no nga rangi o tua iho.
- 3
- No reira ratou ka tukua atu ai e ia, kia taea ra ano te wa e whanau ai tenei e whakamamae nei: ko reira nga toenga o ona tuakana, o ona teina ka hoki mai ki nga tamariki a Iharaira.
- 4
- A ka tu ia, ka whangai hipi i runga i te kaha o Ihowa, i runga i te nui o te ingoa o Ihowa o tona Atua; a ka noho ratou; no te mea ko akuanei ia nui ai, a nga pito ra ano o te whenua.
- 5
- A hei maunga rongo tenei tangata, ina tae mai te Ahiriana ki to tatou whenua: i te wa ano hoki e takahi ai ia ki o tatou whare kingi, ka ara i a tatou etahi hepara tokowhitu hei whawhai ki a ia, me etahi rangatira o nga tangata tokowaru.
- 6
- Ka whakahaere tikanga ano hoki ratou mo te whenua o Ahiria ki te hoari, mo te whenua ano o Nimiroro i ona tomokanga atu: na ka whakaorangia tatou e ia i te Ahiriana, ina haere mai ki to tatou whenua, ina takahi i roto i o tatou rohe.
- 7
- A ka rite nga toenga o Hakopa i roto i nga iwi maha ki te tomairangi a Ihowa, ki nga ua i runga i te tarutaru, e kore nei e whanga ki te tangata, e kore ano e tatari ki nga tama a te tangata.
- 8
- Na, nga toenga o Hakopa i roto i nga tauiwi, i roto i nga iwi maha, ka rite ki te raiona i roto i nga kararehe o te ngahere, ki te kuao raiona i roto i nga kahui hipi: ki te tika atu hoki ia i waenga, ka takatakahi, ka haehae, kahore hoki he kai whakaora.
- 9
- Ka ara to ringa ki runga ki o hoa riri, a ka hatepea atu o hoa riri katoa.
- 10
- Na, i taua rangi ano, e ai ta Ihowa, ka hatepea atu e ahau o hoiho i roto i a koe, ka kore ano hoki i a au o hariata;
- 11
- Ka kore ano hoki i a au nga pa o to whenua, ka wawahia ano e au o pa kaha katoa;
- 12
- Ka hatepea atu ano e ahau nga makutu i roto i to ringaringa, kahore atu ano hoki he tohunga maori i roto i a koe:
- 13
- Ka hatepea atu e ahau o whakapakoko, me o pou whakaahua, i roto i a koe; a e kore koe e koropiko i muri nei ki te mahi a o ringaringa.
- 14
- Ka hutia atu ano e ahau o ngahere i roto i a koe; ka whakangaromia ano hoki o pa.
- 15
- Ka rapua ano e ahau he utu i nga tauiwi i runga i te riri, i te weriweri, he mea kihai i rangona e ratou i mua.
Address: 
Phone: 
Email: