- 1
- Tena ra, whakarongo ki te kupu i korerotia e Ihowa, Whakatika, totohe ki nga maunga, kia rangona ano hoki tou reo e nga pukepuke.
- 2
- Whakarongo mai ki ta Ihowa totohe, e nga maunga, e nga turanga kaha ano hoki o te whenua: he totohe hoki ta Ihowa ki tona iwi, ka riria ano hoki e ia te he o Iharaira.
- 3
- E toku iwi, i aha ahau ki a koe? he ahatanga naku i hoha ai koe? Whakaaturia mai taku he.
- 4
- Naku na hoki koe i kawe mai i te whenua o Ihipa, naku ano koe i hoko i roto i te whare pononga, a ungā atu ana e ahau a Mohi, ratou ko Arona, ko Miriama.
- 5
- Kia mahara, e toku iwi, ki te whakaaro i whakatakotoria e Paraka kingi o Moapa, ki te kupu ano hoki i whakahokia mai ki a ia e Paarama tama a Peoro i Hitimi, a tae noa ki Kirikara, kia mohio ai koutou ki te tika a Ihowa.
- 6
- He aha taku e haere ai ahau ki te aroaro o Ihowa e piko ai ahau ki te Atua i runga? he patunga tapu ranei te mea e haere ai ahau ki tona aroaro, he kuao kau ranei, he tau tahi?
- 7
- E manako ranei a Ihowa ki nga mano o nga hipi toa, ki nga tekau ranei o nga mano o nga awa hinu? me hoatu ranei e ahau taku matamua hei utu mo toku pokanga ketanga, te hua o toku kopu mo te hara o toku wairua?
- 8
- E whakaaturia mai ana e ia, e te tangata, ki a koe te mea pai; he aha ake hoki ta Ihowa e rapu nei ki a koe? he teka ianei ko te whakarite whakawa, ko te pai ki te tohu tangata, ko te whakaiti i a koe, ko te haere tahi i to Atua?
- 9
- E karanga ana te reo o Ihowa ki te pa, ka kite ano hoki te tangata whakaaro nui i to ingoa: whakarongo koutou ki te whiu, ki te kai whakarite mai ano hoki o te whiu.
- 10
- He taonga ano ranei tera na te poka ke i roto i te whare o te tangata kino? me taua mea whakarihariha ano, me te mehua iti?
- 11
- Ki taku e ma ranei nga pauna kino, te putea ranei i nga weiti tinihanga?
- 12
- Ki tonu na hoki i te tutū ona tangata taonga, e korero teka ana hoki ona tangata, a e tinihanga ana o ratou arero i roto i o ratou mangai.
- 13
- Mo reira ka meinga ano hoki koe e ahau kia mate, he whiuwhiu hoki naku i a koe, he meatanga hoki i a koe kia mokemoke, hei utu mo ou hara.
- 14
- Ka kai koe, e kore ano e makona, i waenganui ano hoki i a koe to whakaitinga; ka hopukia atu ano e koe, heoi e kore e ora i a koe; te mea ano i ora i a koe ka hoatu e ahau ki te hoari.
- 15
- Ka whakato koe, e kore ano ia koe e kokoti; ka takahi oriwa koe, e kore ano koe e whakawahi i a koe ki te hinu; i te waina hou ano hoki, e kore ano koe e inu i te waina.
- 16
- No te mea e puritia ana nga tikanga a Omori, me nga mahi katoa ano hoki o te whare o Ahapa, a e haere ana koutou i runga i ā ratou whakaaro; he mea e meinga ai koe e ahau kia mokemoke; nga tangata ano hoki o kona hei whakahīanga atu: ka mau ano hoki ki a koutou te ingoa kino o toku iwi.
Address: 
Phone: 
Email: