Numbers Chapter 30 - Paipera Tapu 1868 | Te Paipera Tapu 1868

Numbers Chapter 30 - Paipera Tapu 1868

1
Na, ka korero a Mohi ki nga ariki o nga iwi o nga tamariki a Iharaira, ka mea, Ko te mea tenei i whakahaua e Ihowa.
2
Ki te puaki te kupu taurangi a te tangata ki a Ihowa, ki te oati ranei i te oati e mau ai tona wairua te here; kei whakatakā e ia tana kupu, kia rite tana e mea ai ki nga mea katoa i puta mai i tona mangai.
3
Ki te puaki ano hoki te kupu taurangi a te wahine ki a Ihowa, a ka mau tana here ki a ia, i a ia ano i te whare o tona papa i tona tamarikitanga;
4
A ka rongo tona papa ki tana kupu taurangi, ki tana here hoki i herea ai e ia tona wairua, a ka whakarongo kau tona papa ki a ia, na, ka mau ana kupu taurangi katoa, ka mau ano hoki nga here katoa i herea ai e ia tona wairua.
5
Tena ko tenei, ka whakakahoretia e tona papa i te ra i rongo ai ia; e kore tetahi o ana kupu taurangi, o ana here hoki i herea ai e ia tona wairua e u: a ka whakarerea noatia mai e Ihowa ki a ia, no te mea kua whakakahoretia tana e tona papa.
6
A ki te mea he tahu tona, a ka puaki tana kupu taurangi, ka puta mai ranei i ona ngutu te mea e herea ai e ia tona wairua;
7
A ka rongo tona tahu, a ka whakarongo puku ki a ia i te ra i rongo ai, na, ka u ana kupu taurangi, ka mau ano hoki nga here i herea ai e ia tona wairua.
8
Tena ko tenei, ka whakakahoretia tana e tona tahu i te ra i rongo ai ia, na ka taka i a ia tana kupu taurangi i puaki i a ia, me te mea i puta mai i ona ngutu, i herea ai e ia tona wairua, a ka whakarerea noatia atu e Ihowa ki a ia.
9
Ko te kupu taurangi ia a te pouaru, a te wahine ranei i whakarerea, ko nga mea katoa i herea ai e ia tona wairua, ka u ki a ia.
10
Ki te mea ia no te whare mai ano o tona tahu tana kupu taurangi, tana herenga ranei i te here, ara, i te oati, ki tona wairua;
11
A i rongo ano tona tahu, i whakarongo puku hoki ki a ia, a kihai i whakakahore i tana: na ka mau ana kupu taurangi katoa, ka mau ano hoki nga here katoa i herea ai e ia tona wairua.
12
Tena ko tenei, i whakatakā rawatia aua mea e tona tahu i te ra i rongo ai ia; e kore e u tetahi mea i puta mai i ona ngutu mo ana kupu taurangi, mo te mea e herea ai tona wairua: kua whakatakā e tona tahu, a ka whakarerea noatia mai e Ihowa ki a ia.
13
Ko nga kupu taurangi katoa, me nga oati here katoa hei pehi i te wairua, ma tona tahu e whakau, ma tona tahu hoki e whakataka.
14
Tena ko tenei, ka whakarongo puku tonu tona tahu ki a ia i tena ra i tena ra; na, kua whakaungia e ia ana kupu taurangi katoa, ara, ana here katoa i mau ai ia: kua whakaungia e ia, no te mea i whakarongo puku ia ki a ia i te ra i rangona ai e ia.
15
A ki te whakatakā e ia tetahi wahi o aua mea i muri iho i tona rongonga ai; na, ka wahā e ia te kino o taua wahine.
16
Ko nga tikanga enei i whakahaua e Ihowa ki a Mohi ma te tangata raua ko tana wahine, ma te papa raua ko tana tamahine i te mea he taitamahine ia, i te whare o tona papa.