- 1
- A i korero ano a Ihowa ki a Mohi, i mea,
- 2
- Rapua he utu mo nga tamariki a Iharaira i nga Miriani: muri iho ka kohia koe ki tou iwi.
- 3
- Na, ka korero a Mohi ki te iwi, ka mea, Kia mau patu etahi o koutou mo te whawhai, ka whakaeke ai i a Miriana, ka tohe ai i ta Ihowa utu i a Miriana.
- 4
- Kia kotahi te mano o tenei iwi o tenei iwi, puta noa i nga iwi katoa o Iharaira, e ungā e koutou ki te whawhai.
- 5
- Na, ka wehea mai e ratou i roto i nga mano o Iharaira, he mano no tenei iwi no tenei iwi, tekau ma rua nga mano, rite tonu i te patu mo te whawhai.
- 6
- Na, ka ungā ratou e Mohi ki te whawhai, he mano no tenei iwi no tenei iwi, a ratou ko Pinehaha tama a Ereatara tohunga, ki te whawhai, me nga mea tapu hoki, me nga tetere i tona ringa hei whakatangi.
- 7
- Na, ka whawhai ratou ki a Miriana, ka pera me ta Ihowa i whakahau ai ki a Mohi; a patua iho e ratou nga tane katoa.
- 8
- Me nga kingi ano hoki o Miriana, i patua tahitia i roto i era o ratou i hinga, a Ewi ratou ko Rekeme, ko Turu, ko Huru, ko Repa, tokorima nga kingi o Miriana: i patua ano hoki e ratou a Paraama tama a Peoro ki te hoari.
- 9
- A whakaraua atu ana e nga tamariki a Iharaira nga wahine a Miriana, me a ratou kohungahunga; i tangohia ano hoki a ratou kararehe katoa, hei taonga pārau, me a ratou kahui katoa, me o ratou taonga katoa.
- 10
- Tahuna ake hoki e ratou ki te ahi o ratou pa katoa i noho ai ratou, me o ratou whare rangatira katoa.
- 11
- A tangohia ana e ratou nga taonga katoa, me nga mea pārau katoa, te tangata me te kararehe.
- 12
- A kawea mai ana e ratou ki a Mohi raua ko Ereatara tohunga, ki te whakaminenga ano hoki o nga tamariki a Iharaira nga whakarau, me era mea pārau, me nga taonga, ki te puni ki nga mania o Moapa, ki te wahi o Horano e tata ana ki Heriko.
- 13
- A, te putanga mai o Mohi ratou ko Ereatara tohunga, ko nga ariki katoa o te whakaminenga ki te whakatau i a ratou ki waho o te puni;
- 14
- Na, ka riri a Mohi ki nga rangatira o te ope, ki nga rangatira o nga mano, ki nga rangatira ano hoki o nga rau, i haere mai nei i te whawhai.
- 15
- Na, ko te meatanga atu a Mohi ki a ratou, Kua whakaorangia e koutou nga wahine katoa?
- 16
- Nana, ko nga mea enei i whakaaturia e Paraama hei mea i nga tamariki a Iharaira kia mahi tutu ki a Ihowa i te meatanga ki a Peoro, i pa ai te whiu ki te whakaminenga a Ihowa.
- 17
- Na, patua aianei nga tane katoa i roto i nga kohungahunga, patua hoki nga wahine katoa kua mohio ki te tangata, ara, kua takoto ki te tane.
- 18
- Ko nga kohungahunga wahine katoa ia, kahore nei i mohio, i takoto ki te tane, whakaorangia ma koutou.
- 19
- Ko koutou hoki, me noho koutou ki waho o te puni, kia whitu nga ra: ara, nga tangata katoa i patu i te tangata, me nga mea katoa hoki i pa ki te tangata i patua, me pure koutou e koutou, me a koutou whakarau i te toru o nga ra, i te whitu hoki o nga ra.
- 20
- Me pure ano hoki e koutou nga kakahu katoa, me nga oko hiako, me nga mea katoa i hangā ki te huruhuru koati, me nga oko rakau katoa.
- 21
- A i mea ano a Ereatara tohunga ki nga tangata i whawhai, i haere ki te riri, Ko te tikanga tenei o te ture i whakahaua e Ihowa ki a Mohi;
- 22
- Ko te koura anake, me te hiriwa, te parahi, te rino, te tine, me te matā,
- 23
- Ko nga mea katoa e puta i te ahi, me tuku e koutou na roto i te ahi, a ka kore te poke: otiia me pure ano ki te wai o te whakamotuhaketanga: a ko nga mea katoa e kore e puta i te ahi me tuku na roto i te wai.
- 24
- A i te whitu o nga ra me horoi e koutou o koutou kakahu, a ka kore te poke, a, muri iho haere ki roto ki te puni.
- 25
- A i korero mai a Ihowa ki a Mohi, i mea,
- 26
- Tirohia te maha o te taonga pārau i riro mai, o te tangata, o te kararehe, e korua ko Ereatara tohunga, e nga mātua ariki ano hoki o te whakaminenga:
- 27
- Wehea hoki nga taonga pārau kia rua nga wahi; ma te hunga i hapai i te pakanga i haere atu ki te whawhai, ma te whakaminenga katoa ano hoki.
- 28
- Tangohia ano hoki he takoha ma Ihowa i nga tangata i whawhai, i haere atu na ki te riri: kia kotahi wairua i roto i nga rau e rima, o te tangata, o te kau, o te kaihe, o nga hipi hoki:
- 29
- Me tango e koe i roto i ta ratou hawhe, ka hoatu ai ki a Ereatara ki te tohunga, hei whakahere hapahapai ki a Ihowa.
- 30
- Me tango ano e koe i roto i te hawhe a nga tamariki a Iharaira, kia kotahi wahi i roto i te rima tekau, o te tangata, o te kau, o te kaihe, o te hipi, o nga kararehe katoa, ka hoatu ai ma nga Riwaiti, ma nga kai tiaki o nga mea o te tapenakara o Ihowa.
- 31
- Na, peratia ana e Mohi raua ko Ereatara tohunga me ta Ihowa i whakahau ai ki a Mohi.
- 32
- A ko te taonga, te toenga iho o nga mea i riro pārau mai i nga tangata i whawhai, e ono rau e whitu tekau ma rima mano hipi,
- 33
- E whitu tekau hoki ma rua mano nga kau,
- 34
- E ono tekau ma tahi mano nga kaihe,
- 35
- E toru tekau hoki ma rua mano nga tangata, ara, nga wahine kahore ano i mohio noa, i takoto noa, ki te tane.
- 36
- A, tera hawhe, te wahi o te hunga i haere ki te whawhai, e toru rau e toru tekau ma whitu mano te maha, e rima hoki nga rau o nga hipi.
- 37
- A, te takoha ma Ihowa o nga hipi e ono rau e whitu tekau ma rima.
- 38
- E toru tekau hoki ma ono mano nga kau; a, te takoha ma Ihowa e whitu tekau ma rua.
- 39
- E toru tekau mano e rima rau nga kaihe; a, te takoha ma Ihowa e ono tekau ma tahi.
- 40
- Kotahi tekau hoki ma ono nga mano tangata; a, te takoha ma Ihowa e toru tekau ma rua tangata.
- 41
- Na, ka hoatu e Mohi te takoha, te whakahere hapahapai ma Ihowa ki a Ereatara tohunga, ka peratia ano me ta Ihowa i whakahau ai ki a Mohi.
- 42
- A i tangohia i roto i te hawhe a nga tamariki a Iharaira i wehea mai nei e Mohi i roto i ta te hunga i whawhai,
- 43
- (A, te hawhe a te whakaminenga e toru rau e toru tekau ma whitu mano e rima hoki nga rau hipi,
- 44
- E toru tekau hoki ma ono mano nga kau,
- 45
- E toru tekau mano e rima hoki rau o nga kaihe,
- 46
- Kotahi tekau ma ono mano o nga tangata;)
- 47
- Ina, i tangohia e Mohi i roto i te hawhe a nga tamariki a Iharaira, kotahi wahi i roto i te rima tekau, o te tangata, o te kararehe; a hoatu ana ki nga Riwaiti i tiaki nei i nga mea o te tapenakara o Ihowa; i peratia ano me ta Ihowa i whakahau ai ki a Mohi.
- 48
- Na, ka haere mai ki a Mohi nga rangatira mano o te ope, nga rangatira mano ratou ko nga rangatira rau:
- 49
- A ka mea ki a Mohi, Kua tirohia e o pononga te tokomahatanga o nga tangata i whawhai nei i raro i o matou ringa, a kahore ano i ngaro tetahi o matou.
- 50
- Koia i kawea mai ai e matou he whakahere ma Ihowa, e ia tangata e ia tangata tana i whiwhi ai, etahi mea koura, etahi mekameka, poroporo, mowhiti, whakakai, heitiki hoki, hei mea whakamarietanga mo o matou wairua ki te aroaro o Ihowa.
- 51
- Na, ka tangohia e Mohi raua ko Ereatara tohunga te koura i a ratou, he mea mahi katoa.
- 52
- A kotahi tekau ma ono mano e whitu nga rau e rima tekau nga hekere o te koura katoa o te whakahere i whakaherea e ratou ki a Ihowa, o ta nga rangatira mano, ratou ko nga rangatira rau.
- 53
- I pahuatia mai hoki e nga tangata i whawhai etahi taonga mona ake, mona ake.
- 54
- Na, tangohia ana e Mohi raua ko Ereatara tohunga te koura a nga rangatira o nga mano, o nga rau, a kawea ana e raua ki roto ki te tapenakara o te whakaminenga, hei whakamaharatanga mo nga tamariki a Iharaira ki te aroaro o Ihowa.
Address: 
Phone: 
Email: