Numbers Chapter 32 - Paipera Tapu 1868 | Te Paipera Tapu 1868

Numbers Chapter 32 - Paipera Tapu 1868

1
Na, he tini whakaharahara nga kahui a nga tamariki a Reupena, ratou ko nga tamariki a Kara: a, to ratou kitenga i te whenua o Iatere, i te whenua hoki o Kireara, na, he wahi pai tena wahi mo nga kahui;
2
Na, ka haere mai nga tamariki a Kara, ratou ko nga tamariki a Reupena, a ka korero ki a Mohi raua ko Ereatara tohunga, ki nga rangatira ano hoki o te whakaminenga, ka mea,
3
Ko Ataroto, ko Ripono, ko Iatere, ko Nimira, ko Hehepona, ko Ereare, ko Hepama, ko Nepo, ko Peono,
4
Ko te whenua katoa i patua na e Ihowa i te aroaro o te whakaminenga o Iharaira, he whenua pai tena mo nga kahui, he kahui ano hoki a o pononga.
5
I mea ano ratou, Ki te mea e manakohia mai ana matou e koe, kia homai tenei whenua kia puritia e o pononga, kaua matou e meatia kia whiti i Horano.
6
Na, ko te meatanga atu a Mohi ki nga tamariki a Kara, ratou ko nga tamariki a Reupena, Ko o koutou teina koia kia haere ki te whawhai, a ko koutou kia noho ki konei?
7
Na te aha koutou i whakakahore ai i te ngakau o nga tamariki a Iharaira kia kaua e whiti atu ki te whenua i homai e Ihowa ki a ratou?
8
I pena ano o koutou mātua i taku tononga i a ratou i Karehe-parenea kia kite i te whenua.
9
I to ratou haerenga hoki ki runga ki te awaawa o Ehekora, a, to ratou kitenga i te whenua, na whakakahoretia ana e ratou nga ngakau o nga tamariki a Iharaira, kia kaua e haere ki te whenua i homai nei e Ihowa ki a ratou.
10
Na, ko te muranga o ta Ihowa riri i taua ra, a ka oati ia, ka mea,
11
E kore rawa nga tangata i haere mai nei i Ihipa, nga mea e rua tekau o ratou tau, me nga mea i maha atu, e kite i te whenua i oati ai ahau ki a Aperahama, ki a Ihaka, ratou ko Hakopa; mo ratou kihai i tino whai i a au.
12
Heoi ano ko Karepe tama a Iepune Keniti, raua ko Hohua tama a Nunu; mo raua i tino whai i a Ihowa.
13
Na, ko te muranga o te riri a Ihowa ki a Iharaira, a meinga ana ratou kia kopikopiko i te koraha, a, e wha tekau nga tau, a poto noa taua whakapaparanga i mahi na i te kino i te tirohanga a Ihowa.
14
Na, kua ara ake nei koutou hei whakakapi mo o koutou mātua, he hunga hara kua whakatokomahatia, e nui ai ano hoki te muranga o ta Ihowa riri ki a Iharaira.
15
No te mea hoki ki te tahuri ke koutou, a e kore e whai i a ia, ka waiho ano hoki ratou e ia i te koraha; a ma koutou ka ngaro ai tenei iwi katoa.
16
Na, ka whakatata mai ratou ki a ia, a ka mea, Me hanga e matou he taiepa hipi ki konei mo a matou kararehe, me etahi pa mo a matou tamariki:
17
Ko matou ia ka haere me a matou patu i mua i nga tamariki a Iharaira, kia kawea ra ano ratou e matou ki te wahi mo ratou: a me noho a matou tamariki ki nga pa e whai taiepa ana, he wehi hoki i nga tangata o tenei whenua.
18
E kore matou e hoki ki o matou whare, kia riro mai ra ano tona kāinga i tenei tangata i tenei tangata o nga tamariki a Iharaira.
19
E kore hoki matou e tu tahi me ratou i te kāinga ki tera taha o Horano, i tua atu ranei; no te mea ka riro mai nei he kāinga mo matou ki tenei taha o Horano, ki te taha ki te rawhiti.
20
Na, ko te meatanga atu a Mohi ki a ratou, Ki te meatia tenei mea e koutou, ki te haere koutou me a koutou patu ki te aroaro o Ihowa ki te whawhai,
21
Ki te whiti katoa hoki koutou i Horano me a koutou patu i te aroaro o Ihowa, kia peia ra ano e ia ona hoa riri i mua i a ia,
22
A ka taea te whenua i te aroaro o Ihowa: katahi koutou ka hoki, a ka hara-kore ki te aroaro o Ihowa, ki te aroaro ano hoki o Iharaira; a mo koutou tenei whenua hei nohoanga ki te aroaro o Ihowa.
23
Tena ko tenei, ka kore koutou e pena, nana, kua hara koutou ki a Ihowa; a kia mohio koutou, e hopukia ano koutou e to koutou hara.
24
Hangā nga pa mo a koutou tamariki, me nga taiepa mo a koutou hipi; meatia ano hoki te mea i puta mai i o koutou mangai.
25
Na, ka korero mai nga tamariki a Kara ratou ko nga tamariki a Reupena ki a Mohi, ka mea, Me pena o pononga me ta toku ariki i whakahau ai.
26
Ko reira a matou tamariki, a matou wahine, a matou kahui, me a matou kararehe katoa, ko nga pa o Kireara:
27
Ko o pononga ia me whiti katoa atu, rite rawa i te patu mo te pakanga, whawhai ai i te aroaro o Ihowa; me pera me ta toku ariki i ki ai.
28
Na, ka whakahaua atu te tikanga mo ratou e Mohi ki a Ereatara tohunga, ratou ko Hohua tama a Nunu ko nga mātua ariki o nga iwi o nga tamariki a Iharaira:
29
A ka mea a Mohi ki a ratou, Ki te whiti katoa atu i roto i a koutou nga tamariki a Kara i Horano, ratou ko nga tamariki a Reupena, me a ratou patu ano, whawhai ai ki te aroaro o Ihowa, a ka taea te whenua i to koutou aroaro; na me hoatu e koutou te whenua o Kireara kia puritia e ratou:
30
A ki te kahore ratou e whiti tahi i a koutou, me a ratou patu, na, tena he wahi hei puritanga ma ratou i roto i a koutou i te whenuna o Kanaana.
31
Na, ko te whakahokinga mai a nga tamariki a Kara, ratou ko nga tamariki a Reupena, ka mea, Ka rite tonu ta matou e mea ai ki ta Ihowa i korero mai ai ki o pononga.
32
Me whiti atu matou me a matou patu i te aroaro o Ihowa ki te whenua o Kanaana, a hei puritanga ano ma matou to matou kāinga i tenei taha o Horano.
33
Na, ka homai e Mohi ki a ratou ki nga tamariki a Kara, ratou ko nga tamariki a Reupena, ko tetahi taanga o te iwi o Manahe tama a Hohepa te kingitanga o Hihona kingi o nga Amori, me te kingitanga o Oka kingi o Pahana, te whenua me ona pa i roto i nga rohe, ara, nga pa o te whenua, a, tawhio noa.
34
Na, ka hangā e nga tamariki a Kara a Ripono, a Ataroto, a Aroere,
35
Me Aterotohopana, me Iatere, me Iokopeta,
36
Me Pete-nimira, me Pete-harana, he pa taiepa: me nga taiepa mo nga hipi.
37
A na nga tamariki a Reupena i hanga a Hehepona, a Ereare, a Kiriataima,
38
A Nepo, a Paara-meono, (i whakaputaia ketia hoki nga ingoa,) me Hipima: i huaina ano hoki e ratou he ingoa ke ki nga pa i hangā e ratou.
39
A i haere atu nga tamariki a Makiri tama a Manahe ki Kireara, a tangohia ana e ia, peia ana hoki te Amori i reira.
40
A i hoatu e Mohi a Kireara ki a Makiri tama a Manahe; a noho ana i reira.
41
A i haere a Haira tama a Manahe, a tangohia ana e ia nga pa iti o reira, a huaina iho e ia, ko Hawoto-haira.
42
A i haere a Nopaha, a tangohia ana e ia a Kenata, me ona pa ririki, a huaina iho ki tona ingoa, ki a Nopaha.