Proverbs Chapter 19 - Paipera Tapu 1868 | Te Paipera Tapu 1868

Proverbs Chapter 19 - Paipera Tapu 1868

1
Te rawa-kore e haere ana i runga i tona tapatahitanga, engari ia i te tangata he whanoke ona ngutu, a he whakaaro-kore ano ia.
2
Ehara ano hoki i te mea pai kia kaua he matauranga mo te wairua; te tangata ano hoki e hohoro ana ona waewae, ka hara.
3
E whakaparoritia ana to te tangata ara e tona wairangi: e riri ana ano tona ngakau ki a Ihowa.
4
Ma te rawa ka tokomaha ai nga hoa aroha: e wehea atu ana ia te rawa-kore i tona hoa aroha.
5
E kore te kai whakapae teka e whakaharakoretia; e kore ano e mawhiti te tangata korero teka.
6
He tokomaha hei whakamarie i te rangatira; he hoa aroha ano hoki nga tangata katoa no te tangata e homai mea ana.
7
E kino ana nga teina katoa o te rawa-kore ki a ia; ona hoa ano hoki, matara noa atu ratou i a ia; whai noa ia, korero noa ia, heoi kahore noa iho ratou.
8
Te tangata e mea ana ki te ngakau mahara mona, e aroha ana ia ki tona wairua: te tangata e pupuri ana i te matauranga, ka tutaki ia ki te pai.
9
E kore te kai whakapae teka e whakaharakoretia; ka ngaro ano te tangata korero teka.
10
E kore e tau te ngakau koa ki te whakaaro-kore; me te pononga ano hei rangatira mo nga rangatira.
11
Te tangata ngarahu tupato ka pupuri ia i tana riri; a hei whakakororia mona te whakarere noa iho i te he.
12
Te riri a te kingi, rite tonu ki te hamamatanga o te raiona, tana manako mai, ano ko te tomairangi i runga i te tarutaru.
13
Hei he mo tona pāpā te tamaiti whakaaro-kore: me nga ngangaretanga ano hoki a te wahine, ano he matuturu e puputu tonu ana.
14
He whare, he taonga, no nga mātua era, na Ihowa ia te hoa wahine mahara.
15
Ma te mangere ka au ai te moe; ka mate-kai ano hoki te wairua o te rora.
16
Te tangata e pupuri ana i te whakahaunga e pupuri ana i tona wairua, te tangata e whakahawea ana ki ona ara, ka mate.
17
Te ohaoha ki te rawa-kore, e whakatarewa moni ana ia ki a Ihowa; ka utua ano tana mahi atawhai.
18
Pakia to tamaiti i te wa e takoto ai he whakaaro mona; kaua hoki tou ngakau e manawapa ina tangi ia.
19
He tangata riri nui ka pangia e te he: ki te whakaora hoki koe i a ia, ka maha ano o whakaoranga.
20
Whakarongo ki te kupu tohutohu, tahuri mai hoki ki te ako, kia nui ai ou whakaaro i tou mutunga iho.
21
He maha nga whakaaro i roto i te ngakau o te tangata; e tu tonu ano ia ta Ihowa tikanga.
22
Ta te tangata e hiahia ai ko te mahi atawhai mana, engari ano hoki te rawa-kore i te tangata korero teka.
23
Ko te wehi ki a Ihowa te ara ki te ora; te tangata e pera ana ka noho makona; e kore tetahi he e pa ki a ia.
24
E kuhua ana tona ringa e te tangata mangere ki te uma, e kore ano e whakahokia mai e ia ki tona mangai.
25
Pakia te tangata whakahi, a ka tupato nga kuare: riria te tangata mahara ina he, a ka mohio ia ki te matauranga.
26
Te tangata i pau ai nga mea a tona pāpā, a e peia ana e ia tona whaea, he tamaiti ia e puta ai te whakama me te ingoa kino.
27
Kati, e taku tamaiti, te whakarongo ki te ako e kotiti ke atu ai koe i nga kupu o te matauranga.
28
Ta te kai whakaatu he, he whakahi ki te whakarite whakawa; e horomia ana hoki te kino e te mangai o te hunga kino.
29
Kua rite nga whakarite whakawa mo te hunga whakahi, me nga whiu ano mo te tuara o nga whakaaro-kore.