- 1
- Ta te waina he whakahi, ta te wai kaha he ngangau. Te hunga katoa e whakapohehetia ana e tera, kahore o ratou whakaaro nui.
- 2
- Ano he raiona e tangi ana te wehi o te kingi: te tangata e whakaoho ana i a ia kia riri, e hara ana ki tona wairua ake.
- 3
- He whakahonore mo te tangata te whakarere ngangare; ta nga wairangi katoa ia he poka noa atu.
- 4
- Ta te mangere he mea ki te maeke, kore ake e parau; tera ia ka pakiki kai mana i te kotinga witi, a kahore noa iho.
- 5
- He wai hohonu te whakaaro i roto i te ngakau o te tangata; e utuhia ano ia e te tangata matau.
- 6
- Ta te tini o te tangata he kauwhau i tana atawhai, i tana atawhai; ko wai ia e kite i te tangata pono?
- 7
- Ta te tangata tika he haere i runga i tona tapatahitanga: ka manaakitia ana tamariki i muri i a ia.
- 8
- Te kingi e noho ana i runga i te torona whakarite whakawa, titaritaria ana e ona kanohi nga he katoa.
- 9
- Ko wai e mea, Kua ma i ahau toku ngakau, kua tahia atu oku hara?
- 10
- Nga pauna rereke, nga mehua rereke, tetahi, tetahi he mea whakarihariha ki a Ihowa.
- 11
- He tamaiti nei ano ka mohiotia ia ki ana hanga, he ma ranei, he tika ranei tana mahi.
- 12
- Te taringa rongo, te kanohi titiro, he mea hanga raua e rua na Ihowa.
- 13
- Kaua e matenuitia te moe, kei rawa-koretia koe; titiro mai ou kanohi, a ka makona koe i te taro.
- 14
- Ehara, ehara, e ai ta te kai hoko. Tona haerenga atu, kei te whakamanamana.
- 15
- He koura tena, he tini nga rupi; he taonga utu nui ia nga ngutu o te matauranga.
- 16
- Tangohia te kakahu o te kai whakakapi mo te tangata ke; tona taunaha ano hoki mo ta te wahine ke.
- 17
- Ka reka ki te tangata te taro o te teka; muri iho ia ka ki tona mangai i te kirikiri.
- 18
- Ma te runanga ka u ai nga whakaaro; kia takoto ano hoki nga tikanga ka anga ai koe ki te whawhai.
- 19
- Te tangata e kopikopiko ana ki te kawe korero, ka whakapuakina e ia nga mea ngaro; na kaua e tatatata atu ki te tangata e whakapati ana ona ngutu.
- 20
- Te tangata e kanga ana i tona pāpā, i tona whaea, ka tineia tona rama, nui atu hoki te pouri.
- 21
- I te timatanga e hohoro mai pea te taonga, e kore ia tona mutunga e whakapaingia.
- 22
- Kaua e mea, Ka utua e ahau te kino: taria ta Ihowa, a kei a ia he oranga mou.
- 23
- He mea whakarihariha ki a Ihowa nga taimaha rereke; e kore ano te pauna tinihanga e pai.
- 24
- Na Ihowa nga haereerenga o te tangata; ma te aha ano hoki te tangata ka matau ai ki tona ara?
- 25
- Hei rore mo te tangata te kai i te mea tapu, te uiui ano hoki i muri i nga kupu taurangi.
- 26
- Ka titaritaria e te kingi whakaaro nui te hunga kino, ka hurihuria ano e ia te wīra ki runga ki a ratou.
- 27
- He rama na Ihowa te manawa o te tangata, e rapu ana i nga mea katoa i roto rawa i te kopu.
- 28
- Hei kai tiaki mo te kingi te atawhai me te pono; e tautokona ake ana hoki tona torona e te atawhai.
- 29
- To nga taitamariki kororia ko to ratou kaha; to nga kaumatua ataahua ano hoki ko te hina.
- 30
- E tahia ana te kino e te karawarawa o te whiunga; ko ta nga whiu ano tena ki nga wahi o roto rawa o te kopu.
Address: 
Phone: 
Email: