- 1
- He whakatauki ano hoki enei na Horomona i tuhituhia nei e nga tangata a Hetekia kingi o Hura.
- 2
- To te Atua whakakororia, he huna mea; to nga kingi whakakororia, he rapu mea.
- 3
- To te rangi he tiketike, to te whenua he hohonu, e kore ano hoki to te ngakau o nga kingi e taea te rapu atu.
- 4
- Whakakorea atu te para o te hiriwa, a ka puta mai he oko ma te kai tahi para.
- 5
- Whakakorea atu te tangata kino i te aroaro o te kingi, a ka u tona torona i runga i te tika.
- 6
- Kei whakanui ake koe i a koe ki te aroaro o te kingi, kei tu hoki ki te wahi o nga metararahi.
- 7
- He pai hoki ki te ki atu tetahi ki a koe, Haere mai ki runga nei, kei whakahokia iho hoki koe i te aroaro o te rangatira i kitea nei e ou kanohi,
- 8
- Kei puta wawe atu koe ki te whawhai, kei kore e kitea e koe tau e mea ai i tona mutunga iho, ina meinga koe e tou hoa kia whakama.
- 9
- Tohea ta korua totohe ko tou hoa; kaua hoki e whakaaturia atu te kupu ngaro ki tetahi atu:
- 10
- Kei meinga koe e te tangata e rongo ana kia whakama a kore ake e mutu te korero kino mou.
- 11
- He kupu i tika te korerotanga atu, tona rite kei nga aporo koura i whakanohoia ki nga whakaahua hiriwa.
- 12
- He whakakai koura, he whakapaipai koura para-kore ki te taringa rongo, te tangata whakaaro nui ina riria e ia te he.
- 13
- Rite tonu ki te matao o te hukarere i te kotinga witi te karere pono ki ona kai ngare, ka ora ano hoki i a ia te ngakau o ona ariki.
- 14
- Ko nga kapua me te hau ua-kore hei ritenga mo te tangata e whakamanamana ana ki tana hakari horihori.
- 15
- Ma te ata hanga ka whakaae mai ai te kingi, ma te arero ngawari ano hoki ka mangungu ai te wheua.
- 16
- Kua kitea ranei he honi e koe? Kainga te wahi e pai ana mau, kei ki rawa koe i taua mea, a ruakina mai ana e koe.
- 17
- Kei hokihoki tonu tou waewae ki te whare o tou hoa, kei hoha ia ki a koe, a ka kino ki a koe.
- 18
- Te kai whakaatu, he teka nei tana korero mo tona hoa, te rite mona, ko te patu, ko te hoari, ko te pere koi.
- 19
- He niho whati, he waewae kua takoki, te rite o te tangata e whakawhirinaki ana ki te tangata tinihanga i te wa o te raru.
- 20
- Te tangata e waiata ana ki te ngakau pouri, tona rite kei te tangata tango kakahu i te rangi maeke, kei te winika ano hoki i ringitia ki runga ki te hora.
- 21
- Ki te mate-kai tou hoa riri, whangaia ki te taro; ki te mate-wai, whakainumia ki te wai.
- 22
- Ka purangatia hoki e koe nga waro kapura ki runga ki tona mahunga, a ka utua tau e Ihowa.
- 23
- Ta te hau nota he whakatupu i te ua, ta te arero ngautuara he kanohi riri.
- 24
- Te kokonga o te tuanui, pai atu i te noho tahi raua ko te wahine ngangare i roto i te whare nui.
- 25
- He rongo pai no te whenua tawhiti, rite tonu ki ta te wai matao ki te wairua mate-wai.
- 26
- He manawa whenua i takatakahia, he puna paru te rite o te tangata tika e hinga ana i te aroaro o te tangata kino.
- 27
- E kore te honi e pai, ki te nui te kainga: te rapu ano hoki i to ratou ake kororia ehara i te kororia.
- 28
- Te tangata e kore nei e pehi i tona wairua, tona rite kei te pa kua pakaru, kahore ona taiepa.
Address: 
Phone: 
Email: