- 1
- E kore e pai te honore mo te rangi, tona rite, kei te hukarere i te raumati, kei te ua i te kotinga witi.
- 2
- Te kanga pokanoa, tona rite, kei te manu kopikopiko, kei te warou e rererere ana; e kore e tau.
- 3
- Mo te hoihoi ko te whiu, mo te kaihe ko te paraire, ko te rakau ano hoki mo te tuara o nga wairangi.
- 4
- Kei rite ki tana whakaaro-kore tau kupu ki te wairangi; he mea kei rite ano hoki koe ki a ia.
- 5
- Kia rite ki tona whakaaro-kore to kupu ki te wairangi, kei mea ake ia he whakaaro nui ia.
- 6
- E tapahia ana nga waewae, e inumia ana te he e te tangata e tuku ana i nga korero kia kawea e te wairangi.
- 7
- He hapai puhoi to nga wae o te totitoti: he pera ano te whakatauki i te mangai o nga wairangi.
- 8
- Te tangata e takai ana i te kohatu ki roto ki te kotaha, tona rite kei te tangata e whakakororia ana i te wairangi.
- 9
- Ka wero ake te tataramoa i te ringaringa o te tangata e haurangi ana i te waina, me te whakatauki ano i roto i te mangai o nga wairangi.
- 10
- Te Atua nui, te kai hanga o nga mea katoa, ka utua e ia ta te wairangi, ka utua e ia ta nga kai poka ke.
- 11
- E tahuri atu ana te kuri ki tana ruaki, te wairangi ano hoki e hoki ana ki tona poauau.
- 12
- Ka kite ranei koe i te tangata e mea ake ana ki a ia he whakaaro nui? Engari ta te wairangi, ki ta te whakaaro iho, ka rahi ake i tana.
- 13
- Ki ta te mangere ki ake he raiona kei te ara, he raiona kei nga waharoa.
- 14
- E kongangengangea ana to tatau, me te mau ano ki ona inihi: he pera ano te mangere i runga i tona moenga.
- 15
- E kuhua ana e te mangere tona ringa ki te uma, kahore hoki ona ngakau ki te whakahoki mai ki tona mangai.
- 16
- Ki ta te mangere, nui atu ona whakaaro i o nga tangata tokowhitu e whakaatu mai ana i te tikanga.
- 17
- Te tangata e haere noa atu ana, a ka pokanoa atu ki te whawhai kihai nei i anga mai ki a ia, tona rite kei te tangata e hopu atu ana i nga taringa o te kuri.
- 18
- Rite tonu ki te haurangi e kokirikiri ana i nga mea mura, i nga pere, i te mate,
- 19
- Te tangata e tinihanga ana ki tona hoa, a e mea ana, He teka ianei, he takaro taku?
- 20
- Ki te kahore he wahie, ka mate te ahi, ki te kahore ano hoki he kai kawe korero, ka mutu te ngangare.
- 21
- Ma nga waro nga waro mura, ma nga wahie te ahi; ma te tangata totohe ano hoki te ngangare e whakau.
- 22
- Nga kupu a te kawe korero, ano he patunga, tae tonu iho ki nga wahi o roto rawa o te kopu.
- 23
- He ngutu e wera ana, he ngakau e kino ana, tona rite, kei te maramara rihi i whakakikoruatia ki te para hiriwa.
- 24
- E whakaahua ke ana nga ngutu o te tangata mauahara, e rongoatia ana e ia te tinihanga ki roto ki a ia.
- 25
- Ki te ngawari tona reo, kaua e whakapono ki a ia; e whitu hoki nga mea whakarihariha i roto i tona ngakau.
- 26
- Hei hipoki te tinihanga mo tona mauahara; ka hurahia atu tona kino i roto i te whakaminenga.
- 27
- Te tangata i keria ai te rua, ka taka ano ki roto; ki te whakatakā he kohatu e tetahi, ka hoki mai ano ki a ia.
- 28
- E kino ana te arero teka ki ana i kuru ai; ta te mangai whakapati e mahi ai ko te turaki.
Address: 
Phone: 
Email: