Proverbs Chapter 6 - Paipera Tapu 1868 | Te Paipera Tapu 1868

Proverbs Chapter 6 - Paipera Tapu 1868

1
E taku tamaiti, ki te mea ko tau hei whakakapi mo ta tou hoa, ki te mea kua papaki tou ringa ki to te tangata kē.
2
Kua oti koe te mahanga e nga kupu a tou mangai, kua mau koe i nga kupu a tou mangai,
3
Na, ko tau ra tenei e mea ai, e taku tamaiti, kia ora ai koe, he mea hoki kua tae atu koe ki roto ki te ringa o tou hoa; haere, whakaititia koe, kia mau tou hoa i a koe.
4
Kei tukua iho te moe ki ou kanohi; kei tunewha ou kamo.
5
Whakaorangia koe ano he anaterope i roto i te ringa, ano he manu i roto i te ringa o te kai hopu,
6
Haere ki te popokorua, e te tangata mangere, matakitakina iho ona ara, kia nui ai ou whakaaro:
7
Kahore nei ona kai tohutohu, ona kai tirotiro, ona rangatira,
8
Heoi e mahi kai ana mana i te raumati, e kohikohi ana i te kai mana i te kotinga witi.
9
Kia pehea ake te roa o to takoto, e te tangata mangere? ahea koe maranga ai i to moe?
10
Kia iti ake nei te wahi e parangia ai, kia iti ake nei te moe, kia iti ake te awhinga o nga ringaringa i a koe e takoto na.
11
Na ka rite ki te tangata e haere ana te putanga mai o te muhore ki a koe, tou rawa-kore, ano he tangata he patu nei tana.
12
Te tangata kino, te tangata he, whanoke tonu tona mangai i a ia e haereere ana!
13
E whakakini mai ana ona kanohi, e korero mai ana ona waewae, e ako mai ana ona maihao.
14
Kei roto te whanoke i tona ngakau, e whakatakoto ana ia i te kino i nga wa katoa, e rui ana ia i te ngangare.
15
Mo reira ka huaki tata mai te aitua ki a ia; e kore e aha ka whatiia ia, tē taea te rongoa.
16
Enei mea e ono he mea kino ki a Ihowa; e whitu hoki nga mea e whakariharihangia ana e ia.
17
Te kanohi whakakake, te arero teka, nga ringa whakaheke i te toto hara-kore,
18
Te ngakau e whakatakoto ana i nga whakaaro kino, nga waewae e hohoro ana te rere ki te kino,
19
Te kai whakaatu teka e korero teka ana, te tangata e rui ana i te ngangare ma nga tuakana, ma nga teina.
20
Puritia, e taku tamaiti, te whakahau a tou pāpā, kaua hoki e whakarerea te ture a tou whaea.
21
Kia mau tonu te takai ki tou ngakau, heia ki tou kaki.
22
Ko tou kai arahi ano tera ina haere koe, mana koe e tiaki ina takoto koe, ka korero mai ano ki a koe, ina ara koe.
23
Hei rama hoki te whakahau, hei māramatanga te ture; hei ara ano ki te ora nga riringa e whakaako mai ana.
24
Hei tiaki i a koe kei he i te wahine kino, i te whakapati a te arero o te wahine ke.
25
Kei hiahia koe ki tona ataahua i roto i tou ngakau, kei mau ano koe i ona kamo.
26
He wahine puremu hoki, heoi ano te kai e mahue ko tetahi wahi taro; te wahine moe ke, tana e whai ai ko te wairua utu nui.
27
Ki te tango te tangata i te ahi ki roto ki tona uma, e kore ranei ona kakahu e wera?
28
Ki te haere te tangata i runga i nga waro mura, e kore ranei ona waewae e wera?
29
Ka pera ano te tangata e haere ana ki te wahine a tona hoa; e kore e watea i te he te tangata e pa ana ki a ia.
30
E kore e whakahaweatia te tahae, ki te tahaetia e ia nga mea e makona ai tona hiahia ina hiakai ia.
31
Ki te kitea ia, kia takiwhitu ana utu; me homai e ia nga rawa katoa o tona whare.
32
Te tangata ia e puremu ana ki te wahine, kahore ona ngakau: te tangata e pera ana, kei te whakangaro ia i tona wairua.
33
He patu, he whakama te wahi mona, e kore ano tona ingoa kino e taea te horoi.
34
He riri nui hoki na te tangata te hae, e kore ano e tohungia e ia i te ra rapu utu.
35
E kore ia e manako mai ki tetahi utu; e kore ia e pai mai ahakoa nui noa to hakari.