- 1
- E taku tamaiti, puritia aku kupu, hunā hoki aku whakahau ki roto i a koe.
- 2
- Puritia aku whakahau, a e ora; taku ture, ano ko te whatupango o tou kanohi.
- 3
- Herea ki ou maihao, tuhituhia, ko tou ngakau ano hei papa.
- 4
- Ki atu ki te whakaaro nui, He tuahine koe noku; karangatia hoki te matauranga he whanaunga.
- 5
- Kia ai enei hei tiaki i a koe kei he i te wahine ke, i te wahine ke, he korero whakapati nei ana.
- 6
- I titiro atu hoki ahau i te matapihi o toku whare i roto i oku kaho,
- 7
- I matakitaki hoki ki nga kuare, i kite i tetahi tamaiti ngakau-kore i roto i nga taitamariki,
- 8
- E haere ana i te ara i te wahi e piko atu ai ki a ia; haere ana ia i te ara ki tona whare.
- 9
- I te kakarauritanga, i te ahiahi o te ra, i te mea ka po rawa, i te mea ka pouri kerekere;
- 10
- Na, kua tutaki tetahi wahine ki a ia, he kakahu puremu tona, he ngakau hianga.
- 11
- He mangai nui ia, he tohe; haereere tonu ia, e kore e noho ki te whare.
- 12
- He wa ano kei roto, he wa ano kei nga ara, whanga ana ia i nga koki katoa.
- 13
- Na hopukia atu ana ia e ia, kei te kihi i a ia, u tonu tona mata e mea ana ki a ia,
- 14
- He patunga whakamarietanga aku: no naianei i whakamanā ai e ahau aku kupu taurangi.
- 15
- Koia ahau i haere mai ai ki te whakatau i a koe, ki te ata rapu i a koe, a tupono atu nei ahau ki a koe.
- 16
- Taku moenga, whakapaipai rawa ki te kaitaka, ki nga mea whakairo, ki te rinena pai o Ihipa.
- 17
- Kakara tonu ano toku moenga, he mea mea naku ki te maira, ki te aroe, ki te hinamona.
- 18
- Haere mai, kia whaowhina taua ki te aroha, a ao noa, kia ora te ngakau i te aroha.
- 19
- Kahore hoki taku tane i te whare: kua riro ia, he roa te ara.
- 20
- I maua atu ano e ia he putea moni i tona ringa; ka hoki mai ano i te kowhititanga o te marama.
- 21
- Kumea ana ia e ia, he maha hoki no ana korero; akina ana ia e ana ngutu whakapati.
- 22
- Haere tonu atu ia i muri i a ia, ano he kau e haere ana kia patua, ano he kuare ina haere ki nga rakau here waewae e whiua ai te he;
- 23
- A, tu noa tona ate i te tao; rite tonu ia ki te manu e hohoro ana ki te mahanga, tē mohio he matenga mona tera.
- 24
- Na, whakarongo mai ki a au, e nga tamariki, maharatia nga kupu a toku mangai.
- 25
- Kei peau ke atu tou ngakau ki ona ara, kei kotiti ke atu ki ona huarahi.
- 26
- He tokomaha hoki nga tangata i tu, i hinga i a ia; he tokomaha ano te hunga kaha i patua e ia.
- 27
- He huarahi tona whare ki te reinga, e anga ana ki raro ki nga ruma o te mate.
Address: 
Phone: 
Email: