- 1
- (Ki te tino kai whakatangi. He Hohanimi ma nga tamariki a Koraha. He Makiri, he waiata aroha.) E pupuke ake ana te mea pai i roto i toku ngakau: ka korerotia e ahau aku i tito ai mo te kingi: he pene toku arero na te kai tuhituhi hohoro.
- 2
- Engari koe e ataahua ana i nga tamariki a te tangata: kua ringihia ou ngutu ki te ahuareka, no reira i manaakitia ai koe e te Atua ake ake ake.
- 3
- Whitikiria to hoari ki to huwha, e te Nui-rawa, to kororia me to honore.
- 4
- Aratakina hoki to hoiho i runga i to honore, i runga i te kaha, hei mea hoki mo te pono, mo te mahaki, mo te tika, a ma to ringaringa matau koe e whakaako ki nga mea whakamataku.
- 5
- E koi ana au pere ki nga ngakau o nga hoa riri o te kingi: a ka hinga nga iwi ki raro i a koe.
- 6
- E pumau ana, e te Atua, tou torona ake ake: he hepeta tika te hepeta o tou kingitanga.
- 7
- E arohaina ana e koe te tika, a e kinongia ana te hara: no reira, nui atu i to ou hoa te whakawahinga a te Atua, a tou Atua i a koe ki te hinu o te hari.
- 8
- He maira kau ou kakahu, he aroa, he kahia i roto i nga whare rei, na ena koe i koa ai.
- 9
- Kei roto i au wahine honore nga tamahine kingi; kei to ringaringa matau te kuini e tu ana, he mea whakakakahu ki te koura o Opira.
- 10
- Whakarongo, e ko, titiro atu hoki, tahuri iho to taringa: a kia wareware koe ki te iwi, ki te whare ano hoki o to pāpā.
- 11
- Penei ka matenuitia e te kingi tou ataahua: ko ia hoki tou Ariki; a me koropiko koe ki a ia.
- 12
- A ko reira ano te tamahine o Taira me te ohaohatanga: ka whai ano nga tangata taonga o te iwi kia manakohia e koe.
- 13
- Kei roto te tamahine o te kingi he kororia kau, he mea whakairo ki te koura tona kakahu.
- 14
- He mea whakapaipai ki te ngira tona kakahu e kawea mai ai ia ki te kingi: ka arahina mai ki a koe nga wahina ona takahoa e whai ana i a ia.
- 15
- Ka kawea mai ratou me te hari me te koa, ka tomo atu ratou ki te whare o te kingi.
- 16
- Ko o tamariki hei whakakapi mo o mātua: a ka meinga ratou e koe hei kawana mo te whenua katoa.
- 17
- Ka meinga e ahau tou ingoa kia maharatia e nga whakatupuranga katoa: ma reira ano hoki koe ka whakamoemititia ai e nga iwi a ake ake.
Address: 
Phone: 
Email: