Psalms Chapter 44 - Paipera Tapu 1868 | Te Paipera Tapu 1868

Psalms Chapter 44 - Paipera Tapu 1868

1
(Ki te tino kai whakatangi, ma nga tamariki a Koraha. He Makiri.) E te Atua, kua rongo o matou taringa, kua korerotia mai ki a matou e o matou mātua, nga mahi i mahia e koe i o ratou ra, i nga ra o mua.
2
To pananga i nga tauiwi ki tou ringaringa, to whakatokanga hoki i a ratou, to whakawhiunga i te iwi, me to peinga i a ratou.
3
Ehara hoki i te mea, na ta ratou hoari i whiwhi ai ratou ki te whenua, ehara to ratou tākakau i te mea i ora ai ratou: engari na tou ringaringa matau, na tou tākakau hoki, na te māramatanga ano hoki o tou mata, he pai hoki nou ki a ratou.
4
E te Atua, ko koe toku Kingi: whakahaua mai he whakaoranga mo Hakopa.
5
Māu ka turaki ai matou i o matou hoa riri; ma tou ingoa ka takahia iho ai e matou te hunga e whakatika mai ana ki a matou.
6
E kore hoki ahau e whakawhirinaki atu ki taku kopere: e kore ano hoki taku hoari e whakaora i a au.
7
Nau hoki matou i whakaora i o matou hoa riri: nau ano i whakama ai te hunga i kino mai ki a matou.
8
Ko te Atua ta matou e whakamanamana atu ai i te roa o te ra: ka whakamoemiti atu ano matou ki tou ingoa ake ake ake. Hera.
9
Otira kua pangā nei matou e koe, kua meinga kia whakama: kahore hoki koe kia haere tahi atu me a matou taua.
10
Kua meinga matou kia hoki whakamuri mai i te hoa riri; kei te pahua ano i etahi ma ratou te hunga e kino mai ana ki a matou.
11
Kua hoatu matou e koe ano he hipi e kainga ana: kua whakamararatia hoki matou ki roto ki nga tauiwi.
12
E hokona ana e koe tou iwi, a hore he utu: kahore ano hoki koe e whai rawa i te utu mo ratou.
13
E meinga ana matou e koe hei tawainga ma o matou hoa kāinga; hei whakahaweatanga, hei whakakatanga mai ma te hunga i tetahi taha, i tetahi taha o matou.
14
E meinga ana matou hei whakatauki ma nga tauiwi; hei rūrūnga mātenga ma nga iwi.
15
Kei mua tonu i a au toku numinumitanga; kua taupokina ahau e te whakama o toku mata;
16
I te reo o te kai tawai, o te kai kohukohu; i te hoa riri, me te kai rapu utu.
17
Kua pa katoa tenei ki a matou; ahakoa ra kahore ano matou i wareware ki a koe, kihai ano hoki i teka ki to kawenata.
18
Kahore o matou ngakau i tahuri whakamuri; kihai ano hoki o matou hikoinga i peka atu i to ara;
19
I to matou marunga i a koe i te wahi o nga tarakona; a taupoki rawa ki te atarangi o te mate.
20
Mehemea kua wareware matou ki te ingoa o to matou Atua, kua whakamārokia ranei o matou ringaringa ki te atua ke;
21
E kore ranei tenei e ata tirohia mai e te Atua? e matau ana hoki ia ki nga mea ngaro o te ngakau.
22
Mou nei hoki matou i patua ai i te ra roa nei: kiia iho matou, He hipi e patua ana.
23
E ara, he aha koe ka moe ai, e te Ariki? whakatika, kaua matou e pangā tonutia.
24
He aha koe ka huna ai i tou mata? ka wareware ai ki ta matou tangihanga, ki to matou tukinotanga?
25
Kua piko nei hoki o matou wairua ki raro ki te puehu; piri rawa o matou kopu ki te whenua.
26
E ara, hei awhina mai i a matou; kia mahara ki tou aroha, a hokoa matou.