- 1
- (Ki te tino kai whakatangi. He himene ma nga tama a Koraha.) Whakarongo ki tenei, e nga iwi katoa: tahuri mai o koutou taringa, e nga tangata katoa o te ao.
- 2
- E nga tangata iti, ratou tahi ko nga tangata rahi, e te tangata taonga raua ko te rawa-kore.
- 3
- Ka whakapuakina atu he matauranga e toku mangai: a he ata ngarahu te whakaaro a toku ngakau.
- 4
- Ka whakatitaha atu ahau i toku taringa ki te kupu whakarite; ka puaki taku pepeha i runga i te hāpa.
- 5
- Kia wehi au ki te aha i nga ra o te kino, ina karapotia ahau e te kino o aku kai turaki?
- 6
- Te hunga e whakawhirinaki ana ki o ratou taonga, a whakamanamana ana ki te nui o o ratou rawa;
- 7
- E kore tetahi o ratou e ahei te hoko i tana teina, te hoatu ranei i tetahi utu mona ki te Atua;
- 8
- (He nui hoki te utu mo o ratou wairua, a me whakarere atu ake ake ake;)
- 9
- Kia ora tonu ai ia ake ake: kia kaua e kite i te pirau.
- 10
- E kite ana hoki ia e matemate ana nga tangata whakaaro nui, e ngaro ngatahi ana te poauau me te whakaaro-kore, a mahue iho o ratou taonga ki etahi atu.
- 11
- Ki ta ratou whakaaro puku, tera e pumau tonu o ratou whare, me o ratou nohoanga, ki nga whakatupuranga katoa: huaina iho ana o ratou whenua ki o ratou ingoa.
- 12
- Heoi kahore e pumau tonu te tangata e whakahonoretia ana: tona rite kei nga kararehe e matemate nei.
- 13
- Ko to ratou nei poauautanga to ratou ara: heoi e whakapai ana to ratou uri ki ā ratou korero. Hera.
- 14
- E whakatakotoria ana ratou ki te rua tupapaku, ano he hipi; ko te mate hei hepara mo ratou, a hei rangatira te hunga tika mo ratou i te ata; ka memeha ano to ratou ataahuatanga; ko te rua hei whare mo ratou.
- 15
- Ma te Atua ia toku wairua e hoko mai i roto i te rua: ko ia hoki hei tukunga atu moku. Hera.
- 16
- Kaua koe e wehi ua whai taonga te tangata, ina nui haere te kororia o tana whare;
- 17
- Kahore hoki ana mea e mau atu ai ia ina mate; e kore tona kororia e heke atu i muri i a ia.
- 18
- He aha ia tē whakapai noa ai i tona wairua i a ia e ora ana? a ka whakamoemititia koe, ua pai au mahi ki a koe ano.
- 19
- Ka haere atu ia ki te whakatupuranga o ona tupuna: e kore ratou e kite i te māramatanga ake ake.
- 20
- Te tangata e whakahonoretia ana, a kahore e whai whakaaro, kei nga kararehe matemate tona rite.
Address: 
Phone: 
Email: