Psalms Chapter 48 - Paipera Tapu 1868 | Te Paipera Tapu 1868

Psalms Chapter 48 - Paipera Tapu 1868

1
(He waiata, he himene ma nga tama a Koraha.) E nui ana a Ihowa, kia nui hoki te whakamoemiti ki a ia i te pa o to tatou Atua, i te maunga o tona tapu.
2
He turanga ataahua a Maunga Hiona, ko ta te ao katoa e koa ai: kei te taha ki te nota te pa o te Kingi nui.
3
E matauria ana te Atua i roto i ona whare papai hei piringa.
4
Na, huihui tahi mai ana nga kingi, haere tahi atu ana ratou.
5
I kite ratou, miharo iho; raruraru ana, hohoro tonu atu.
6
Pa ana te wehi ki a ratou i reira, te mamae, ano he wahine e whanau ana.
7
E wahia ana e koe nga kaipuke o Tarahihi ki te hau ita.
8
Rite tonu ki ta matou i rongo ai, ta matou i kite ai i roto i te pa o Ihowa o nga mano, i te pa o to tatou Atua: ma te Atua e whakapumau ake ake. Hera.
9
I whakaaroaro matou ki tou atawhai, e te Atua, i waenganui o tou temepara.
10
E te Atua, rite tahi ki tou ingoa te whakamoemiti mou, tae noa atu ki nga pito o te whenua: kī tonu tou ringaringa matau i te tika.
11
Kia hari a maunga Hiona, kia koa nga tamahine a Hura i au whakaritenga whakawa.
12
Taiawhiotia a Hiona, haere, a kopiko noa mai: tāua ona pourewa.
13
Maharatia ona pekerangi, tirohia iho ona whare papai; hei korerotanga ma koutou ki anei ake whakatupuranga.
14
Ko tenei Atua hoki te Atua mo tatou ake ake ake: ko ia hei kai arahi i a tatou, a mate noa.