Psalms Chapter 7 - Paipera Tapu 1868 | Te Paipera Tapu 1868

Psalms Chapter 7 - Paipera Tapu 1868

1
(He hikaiono na Rawiri, tana i waiata ai ki a Ihowa, mo nga kupu a Kuhu Peniamine.) E Ihowa, e toku Atua, kei a koe taku whakawhirinakitanga: kia ora ahau i te hunga katoa e tukino ana i a au, kia mokowhiti atu hoki ahau:
2
Kei hahae ia i toku wairua, ano he raiona, a titaritari noa, i te mea kahore he tangata hei arai atu.
3
E Ihowa, e toku Atua, ki te mea naku tena mahi, ki te mea he hara kei oku ringaringa;
4
Ki te mea i whakahokia e ahau he kino ki te tangata kua mau nei ta maua rongo; (i whakaora nei hoki ahau i te tangata i kino noa mai ki a au;)
5
Kia arumia toku wairua e te hoa riri, a kia mau; kia takahia hoki taku ora e ia ki te whenua, kia whakatakotoria ano toku kororia ki roto ki te puehu. Hera.
6
E Ihowa, whakatika, kia riri koe, ara ake, e nana nei hoki oku hoa whawhai: kia oho ake hoki koe ki a au ki te whakawa i kiia e koe.
7
Penei ka karapotia koe e te whakaminenga o nga iwi: kia mahara ki a ratou, a hoki atu ano ki runga.
8
Ma Ihowa e whakarite whakawa mo te iwi; kia rite, e Ihowa, tau whakarite whakawa moku ki taku mahi tika, ki te tapatahitanga hoki o aku whakaaro.
9
Kia whakamutua ra te kino o te hunga kino; whakaukia hoki te tangata tika: e whakamatautau ana hoki te Atua tika i nga ngakau, i nga whatumanawa.
10
Kei te Atua taku whakangungu rakau, mana e whakaora te hunga ngakau tika.
11
Ka whakarite whakawa te Atua mo te tangata tika, a e kore e riri i tenei ra, i tenei ra.
12
Ki te kore ia e tahuri, ka whakakoia e ia tana hoari; kua whakapikoa e ia tana kopere, a oti rawa te whakapai.
13
Oti rawa ano hoki ana mea whakamate te whakapai e ia; kua whakatikaia mai e ia ana pere ki te hunga tukino.
14
Nana, he kino te mea e whakamamae nei ia; he mahi nanakia te mea i hapu ki roto ki a ia a whanau ake he teka.
15
I pokaia e ia he poka he mea keri nana, na, taka iho ia ki roto ki te rua i mahia e ia.
16
Ka hoki mai tana whakaaro nanakia ki runga ki tona mahunga, a ka tau iho tana mahi tukino ki runga ki tona tumuaki.
17
Ka rite ki tona tika taku whakamoemiti ki a Ihowa: ka himene atu hoki ahau ki te ingoa o Ihowa, o te Runga-rawa.