- 1
- (He Makiri na Ahapa.) Kia anga mai te taringa, e toku iwi, ki taku ture: tahuri mai o koutou taringa ki nga kupu a toku mangai.
- 2
- Ka puaki te kupu whakarite a toku mangai, ka korerotia e ahau nga mea ngaro onamata,
- 3
- Nga mea i rongo nei, i matau nei tatou, i korero ai hoki o tatou mātua ki a tatou.
- 4
- E kore e hunā e matou i ā ratou tamariki: me whakakite ki to muri whakatupuranga nga whakamoemititanga ki a Ihowa, me tona kaha, me ana mahi whakamiharo i mea ai ia.
- 5
- I whakapumautia hoki e ia he whakaaturanga i roto i a Hakopa, i whakatakotoria ano hoki he ture i roto i a Iharaira: a whakahaua mai ana e ia o tatou tupuna, kia whakaakona mai ki ā ratou tamariki.
- 6
- Kia matauria ai e to muri whakatupuranga, e nga tamariki e whanau, e ara ake a mua: mo ta ratou whakaatu atu ki ā ratou tamariki.
- 7
- Kia u ai ta ratou tumanakotanga atu ki te Atua, kei wareware hoki ki nga mahi a te Atua: engari kia mau i a ratou ana whakahaunga.
- 8
- Kei rite hoki ki o ratou tupuna, ki te whakatupuranga whakakeke, tutu, ki te whakatupuranga kihai nei i whakatikatika i to ratou ngakau, kihai hoki i u to ratou wairua ki te Atua.
- 9
- He hunga mau patu nga tamariki a Eperaima, he hunga hapai kopere, heoi tahuri ana ratou i te ra o te tatauranga.
- 10
- Kihai i puritia e ratou te kawenata a te Atua; kihai ano i pai ki te haere i tana ture;
- 11
- Heoi, wareware ake i a ratou ana mahi, me ana mea whakamiharo i whakakitea e ia ki a ratou.
- 12
- He mea whakamiharo ana mahi i te aroaro o o ratou tupuna, i te whenua i Ihipa, i te parae o Toana.
- 13
- Tapahia ana e ia te moana, a meinga ana ratou kia whiti atu: tu ake i a ia nga wai, ano he puranga.
- 14
- He mea arahi ratou e ia i te awatea ki te kapua: i te roa hoki o te po ki te māramatanga o te ahi.
- 15
- I wahia e ia nga kohatu i te koraha; a me te mea no nga rire nui tana wai hei inu ma ratou.
- 16
- Puta mai ana i a ia he awa i roto i te kamaka: heke ana nga wai, ano he waipuke.
- 17
- Heoi ka hara ano ratou ki a ia: whakatoi ana ki a te Runga-rawa i te koraha.
- 18
- Na, kei te whakamatautau ratou i te Atua i roto i o ratou ngakau, kei te inoi kai ma o ratou hiahia.
- 19
- I korero kino ano hoki ratou ki te Atua, i mea; E ahei ranei i te Atua te taka he tepara ki te koraha?
- 20
- Titiro hoki, tana patunga i te kohatu, na, ka pakaru mai te wai, a puke ana nga awa: e taea ano hoki ranei e ia te homai taro, e pae ranei i a ia he kikokiko ma tana iwi?
- 21
- A, te rongonga o Ihowa, na ka riri: a toro ana te kapura ki a Hakopa, puta ake ana te riri ki a Iharaira;
- 22
- Mo ratou kihai i whakapono ki te Atua, kihai ano i whakawhirinaki ki tana whakaoranga:
- 23
- Nana nei hoki i whakahau nga kapua i runga, i whakatuwhera hoki nga tatau o te rangi.
- 24
- A whakauaina iho e ia te mana ki runga ki a ratou hei kai; homai ana hoki e ia te witi o te rangi ma ratou.
- 25
- Kai ana te tangata i ta te anahera kai: i tonoa mai e ia he kai ma ratou, a makona noa.
- 26
- I whakaohokia e ia te hau ita i te rangi: i takina mai ano te tonga i runga i tona kaha.
- 27
- A whakauaina iho e ia te kikokiko ki runga ki a ratou, ano he puehu; me te manu whai huruhuru, ano he one no te moana.
- 28
- A whakangahorotia iho e ia ki waenganui i to ratou puni: ki o ratou nohoanga, a tawhio noa.
- 29
- Na, kai ana ratou, tino makona; i kawea mai hoki e ia ki a ratou ta ratou i hiahia ai:
- 30
- Kihai ratou i ngaruru ki ta ratou i hiahia ai; a i te kai ano i o ratou mangai,
- 31
- Na, ka pa te riri a te Atua ki a ratou, a patua iho e ia te hunga tetere o ratou; piko ana i a ia nga tangata papai o Iharaira.
- 32
- Ahakoa pa katoa tenei, i hara tonu ano ratou, kihai ano i whakapono ki ana mahi whakamiharo.
- 33
- No reira o ratou ra i whakapaua ai e ia ki te horihori, o ratou tau ano hoki ki te potatutatu.
- 34
- Ka patua ratou e ia, na, ka rapu ratou i a ia, a ka hoki mai, ka ui wawe ki te Atua.
- 35
- Ka mahara hoki ko te Atua to ratou kohatu, ko te Atua o runga rawa to ratou kai hoko.
- 36
- Heoi kei te patipati o ratou mangai ki a ia, a teka ana o ratou arero ki a ia.
- 37
- Kihai hoki o ratou ngakau i tika ki a ia; kihai ano ratou i u ki tana kawenata.
- 38
- Ko ia ra tena, he mea aroha hoki ia, hipokina ana e ia to ratou hara, kihai ano ratou i whakangaromia e ia: ae ra, he maha ana whakahokinga iho i tana riri, a kihai i whakaohokia katoatia tana riri.
- 39
- I mahara hoki ia he kikokiko nei ano ratou: he hau e pahure atu ana, a e kore e hoki mai.
- 40
- Ano te tini o a ratou whakatoinga i a ia i te koraha, o a ratou whakakapouritanga i a ia i te tahora!
- 41
- Hoki whakamuri ana ratou, whakamatautau ana i te Atua: whakatoia ana e ratou te Mea Tapu o Iharaira.
- 42
- Kihai ratou i mahara ki tona ringaringa, ki te ra i whakaorangia ai ratou e ia i te hoa riri;
- 43
- Ki tana meatanga i ana tohu ki Ihipa, i ana merekara ki te parae o Toana.
- 44
- I puta ke ai i a ia o ratou awa hei toto, me o ratou manga wai, tē inu ai ratou.
- 45
- I tonoa ai e ia nga huihuinga namu ki a ratou, a pau iho ratou; me nga poroka, i hunā ai ratou.
- 46
- A hoatu ana e ia o ratou hua ki te moka; me to ratou mauiui ki te mawhitiwhiti.
- 47
- Whakamatea ana e ia a ratou waina ki te whatu, me a ratou rakau hikamora ki te haupapa.
- 48
- Tukua ana e ia a ratou kararehe ma te whatu, me a ratou kahui ma nga uira.
- 49
- Tukua whakareretia iho e ia ki runga ki a ratou te muranga o tana riri, aritarita, whakatakariri, me te raruraru; a ungā ana e ia he anahera kino ki waenganui i a ratou.
- 50
- A whakatikaia ana e ia he ara mo tana riri; kihai nei i tohungia o ratou wairua kei mate: heoi tukua atu ana e ia to ratou ora ki te mate uruta.
- 51
- A patua iho e ia nga whanau matamua i Ihipa, te muanga o to ratou kaha, i nga tapenakara o Hama.
- 52
- A meinga ana e ia ona tangata kia haere atu, ano he hipi; arahina ana ratou e ia i te koraha, ano he kahui.
- 53
- Na, ka arahina marietia ratou e ia, tē wehi ratou: o ratou hoa riri ia taupokina iho e te moana.
- 54
- Na, ka kawea ratou e ia ki te rohe o tana wahi tapu, ki tenei maunga, i hokoa nei e tona ringa matau.
- 55
- Peia ana e ia nga tauiwi i to ratou aroaro: a wehea ana e ia he kāinga mo ratou ki te aho, whakanohoia iho nga hapu o Iharaira ki o ratou teneti.
- 56
- Heoi ka whakamatautauria, ka whakatoia e ratou te Atua o runga rawa; kihai hoki i puritia e ratou ana whakaaturanga;
- 57
- A hoki whakamuri ana ratou, mahi hianga ana, pera ana me o ratou mātua: he parori ke ratou, he pera me te kopere tinihanga.
- 58
- I whakapouritia ano ia e ratou ki o ratou wahi tiketike: i meinga ki o ratou whakapakoko kia hae.
- 59
- Te rongonga o te Atua, ka riri; ka tino whakarihariha hoki ki a Iharaira.
- 60
- A mahue ake i a ia te tapenakara o Hiro, te teneti i noho ai ia i waenganui i nga tangata.
- 61
- A tukua atu ana e ia tona kaha hei whakarau, me tona kororia ki te ringaringa o te hoa riri.
- 62
- I tukua atu ano e ia tana iwi ma te hoari; a i riri ki tona kāinga tupu.
- 63
- Pau ake a ratou taitamariki i te ahi; kihai ano hoki a ratou kotiro i marenatia atu.
- 64
- I hinga o ratou tohunga i te hoari; kihai hoki i tangi a ratou pouaru.
- 65
- Na, ka maranga ake te Ariki, ano ra me tetahi i te moe, me te tangata kaha e hamama ana i te waina.
- 66
- A patua iho e ia a muri o ona hoa riri, meinga ana ratou e ia hei taunutanga mo a mua tonu atu.
- 67
- I whakakahore ano hoki ia ki te tapenakara o Hohepa: a kihai i whiriwhiri i te hapu o Eperaima.
- 68
- Heoi ko te hapu o Hura tana i whiriwhiri ai, ko manga Hion tana i aroha ai.
- 69
- A whakaturia ana e ia tana wahi tapu kia pera me nga whare tiketike; me te whenua i whakapumautia e ia mo ake tonu atu.
- 70
- I whiriwhiria ano hoki e ia a Rawiri tana pononga: he mea tango mai nana i nga kāinga hipi.
- 71
- Kawea mai ana ia i te whai i nga hipi whaerēre, ki te whangai i a Hakopa, i tana iwi, i a Iharaira hoki, i tona kāinga tupu.
- 72
- A rite tonu ki te tapatahitanga o tona ngakau tana whangainga i a ratou: he arahi mohio hoki ta tona ringa i a ratou.
Address: 
Phone: 
Email: