- 1
- (He himene na Ahapa.) E te Atua, kua tae mai nga tauiwi ki tou kāinga tupu, kua whakanoatia e ratou tou temepara tapu, kua waiho a Hiruharama e ratou kia puranga kau ana.
- 2
- Ko nga tinana mate o o pononga kua hoatu e ratou hei kai ma nga manu o te rangi, te kikokiko o tou hunga tapu ma nga kirehe o te whenua.
- 3
- O ratou toto ringihia ake e ratou, ano he wai, ki nga taha o Hiruharama; kahore hoki he tangata hei tanu.
- 4
- Kua waiho matou hei tawainga ma o matou hoa, hei taunutanga, hei whakakatanga ma te hunga i tetahi taha, i tetahi taha o matou.
- 5
- Kia pehea te roa, e Ihowa? e riri tonu ranei koe ake ake? e ngiha tonu ranei tou hae me he kapura?
- 6
- Ringihia iho to riri ki runga ki nga tauiwi kahore nei e matau ki a koe, ki nga rangatiratanga ano hoki kahore nei e karanga ki tou ingoa.
- 7
- Kua pau hoki a Hakopa i a ratou, kua whakaururuatia tona kāinga noho.
- 8
- Kaua ra e maharatia a matou kino o mua, kia hohoro tou aroha ki mua i a matou; kua whakaititia rawatia hoki matou.
- 9
- Awhinatia, matou, e te Atua o to matou whakaoranga, kia whakakororiatia ai tou ingoa: whakaorangia matou, hipokina hoki o matou hara, kia mahara hoki ki tou ingoa.
- 10
- Mo te aha nga tauiwi kia mea, Kei hea to ratou Atua? kia kite atu matou e matauria ana ia e nga tauiwi ki te whakatakinga i te toto o o pononga i whakahekea nei.
- 11
- Kia puta ake ki tou aroaro te auetanga a te herehere: kia rite ki te nui o tou kaha tau whakaoranga i te hunga e meatia ana kia whakamatea.
- 12
- Takiwhitutia atu te utu e hoatu e koe ki nga uma o o matou hoa mo to ratou tawainga, e tawai nei ratou ki a koe, e te Ariki.
- 13
- Penei ka whakawhetai atu matou tou iwi, nga hipi hoki e hepara nei koe, ki a koe ake ake: ka whakakitea atu e matou te whakamoemiti atu ki a koe, a, tena whakatupuranga, tena whakatupuranga.
Address: 
Phone: 
Email: