- 1
- E aku teina, ta toku ngakau i pai ai i inoi ai ki te Atua ko ia tenei, ko Iharaira kia ora.
- 2
- E whakaae ana hoki ahau ki a ratou, he ngakau nui ano to ratou ki te Atua, otiia ehara i te mea mohio.
- 3
- I a ratou hoki e kuare ana ki ta te Atua tika, a e whai ana kia whakaukia to ratou ake tika, kahore ratou i ngohengohe mai ki te tika a te Atua.
- 4
- Ko te Karaiti hoki te tukunga iho o te ture hei tika mo nga tāngata whakapono katoa.
- 5
- Kua tuhituhia nei hoki e Mohi ta te ture tika, Te tangata e whakarite ana i aua mea, e ora ia i aua mea.
- 6
- Ko te kupu ia tenei o ta te whakapono tika, Aua e mea i roto i tou ngakau, Ko wai hei kake ki te rangi? (ara ki te tiki atu i a te Karaiti ki raro:)
- 7
- Ko wai ranei hei heke atu ki te hohonu? (ara ki te tiki atu i a te Karaiti i roto i te hunga mate)
- 8
- E pehea ana oti? E tata ana ki a koe te kupu, kei tou mangai, kei tou ngakau: ko ia ia, ko te kupu o te whakapono e kauwhau nei matou;
- 9
- Ara ki te whakaae tou mangai ko Ihu te Ariki, a ka whakapono tou ngakau na te Atua ia i whakaara ake i te mate, e ora koe.
- 10
- Ma te ngakau hoki kia whakapono ka tika ai; ma te mangai kia whakaae ka ora ai.
- 11
- E mea ana hoki te Karaipiture, Nga tāngata katoa e whakapono ana ki a ia e kore e whakama.
- 12
- Kahore hoki he rerenga ketanga o te Hurai o te Kariki: e hua tonu ana hoki nga taonga a taua Ariki na ano o nga tāngata katoa, ki te hunga katoa e karanga ana ki a ia.
- 13
- E ora hoki nga tāngata katoa e karanga ana ki te ingoa o te Ariki.
- 14
- A me pehea ta ratou karanga ki a ia, ki te kahore i whakapono ki a ia? me pehea hoki ta ratou whakapono ki a ia, ki te kahore i rongo kia ia? me pehea hoki e rongo ai, ki te kahore he kai kauwhau?
- 15
- Me pehea hoki e kauwhau ai, ki te kahore e tonoa? ko te mea hoki ia i tuhituhia, Ano te ataahua o nga waewae o nga kai kauwhau o te maunga rongo, e kauwhau ana i nga mea pai!
- 16
- Otira kahore ratou katoa i ngohengohe mai ki te rongo pai. E mea ana hoki a Ihaia, E te Ariki, ko wai i whakapono ki ta matou rongo?
- 17
- Ina, na te rongo te whakapono, a i rongo ai, na te kupu a te Atua.
- 18
- Na, ko taku kupu tenei, Kahore ranei ratou i rongo? Koia ra ia, kua puta atu to ratou reo ki te whenua katoa, a ratou kupu hoki ki nga topito o te ao.
- 19
- Na, ko taku kupu tenei, Kahore ianei a Iharaira i mohio? Na Mohi te kupu tuatahi, Maku koutou e mea kia hae ki te hunga ehara i te iwi. Ka meinga e ahau te iwi poauau hei whakaoho i a koutou ki te riri.
- 20
- Maia rawa ia ta Ihaia i mea ai, Kua kitea ahau e te hunga kihai nei i rapu i a au; kua matauria ahau e te hunga kihai nei i ui mai ki a au.
- 21
- Tana kupu ia mo Iharaira, Pau katoa te ra me te totoro atu ano oku ringa ki te iwi tutu, ki te iwi whakahawea.