- 1
- He pono taku korero i roto i a te Karaiti, kahore aku teka, (me te whakaae ano taku hinengaro ki a au i roto i te Wairua Tapu,)
- 2
- Nui atu taku pouri, mau tonu te mamae o toku ngakau.
- 3
- He pai hoki ki a au me i kanga ahau, me i motuhia i a te Karaiti, mo aku teina, mo oku whanaunga o te wahi ki te kikokiko:
- 4
- No Iharaira nei ratou; no ratou nei te whakatamarikitanga, te kororia, nga kawenata, te homaitanga o te ture, te karakia, me nga kupu whakaari;
- 5
- No ratou nei nga mātua, no ratou ano hoki a te Karaiti no te wahi ki te kikokiko, ko ia nei kei runga ake i nga mea katoa, te Atua e whakapaingia ana ake ake. Amine.
- 6
- Ehara ia i te mea, kua taka te kupu a te Atua. Te hunga hoki o Iharaira, ehara i te mea no Iharaira katoa:
- 7
- Ahakoa he uri no Aperahama, ehara ratou katoa i te tamariki: engari, Kei a Ihaka te karangatanga mo ou uri.
- 8
- Ara ko nga tamariki a te kikokiko, ehara enei i te tamariki na te Atua: engari nga tamariki a te kupu whakaari, ka kiia ratou he uri.
- 9
- Ko te kupu whakaari hoki tenei, Kia taka ki tenei wa ka haere mai ahau, a ka whanau ta Hera tamaiti.
- 10
- Na, ehara i te mea ko tenei anake; na, i a Ripeka ano hoki kua hapū i tetahi, i a Ihaka i to matou matua;
- 11
- (I nga tamariki hoki kahore ano i whanau noa, kahore ano hoki i mahi i te pai, i te kino ranei, he mea kia u ai ta te Atua i whakatakoto ai mo te whiriwhiringa, ehara i nga mahi, engari na te kai karanga;)
- 12
- Ka korerotia ki a ia, Ko te tuakana hei pononga ma te teina:
- 13
- Ko te mea ia i tuhituhia, Kua aroha ahau ki a Hakopa, kua kino ki a Ehau.
- 14
- Kia pehea ra ta tatou korero? He tikanga hē koia kei te Atua? Kahore rapea.
- 15
- I mea hoki ia ki a Mohi, E tohu ahau ki taku e tohu ai, e atawhai ahau ki taku e atawhai ai.
- 16
- Ae ra, ehara i te mea na te kai hiahia, ehara i te mea na, te kai oma, engari na te Atua na te kai tohu.
- 17
- E mea nei hoki te Karaipiture ki a Parao, Mo konei pu ano koe i whakaarahia ai e ahau, kia ai koe hei whakakitenga mo toku kaha, kia korerotia ai hoki toku ingoa ki te whenua katoa.
- 18
- Na, ko tana e pai ai e tohungia, a ko tana e pai ai e whakapakeketia.
- 19
- Na, tera koe e mea mai ki a au, He aha ia i riri ai ano? ko wai hoki i whakakeke ki tana i pai ai?
- 20
- Ha, te tangata nei, ko wai koe hei whakahoki kupu atu ki te Atua? Ma te mea hanga koia e mea atu ki tona kai hanga, He aha ahau i peneitia ai te hanga e koe?
- 21
- He teka ianei kei te kai hanga rihi te tikanga mo te paru, kia hangā tetahi wahi o taua mea i pokepokea hei oko honore, a ko tetahi wahi hei mea honore kore?
- 22
- He aha hoki, ki te mea i pai te Atua kia whakaritea tana riri, kia whakapuakina tona kaha, a puta nui ana tona manawanui ki nga oko riri kua whakakitea nei kia whakangaromia?
- 23
- Kia whakakitea ano hoki te hua o tona kororia ki nga oko e tohungia ana, kua rite noa ake nei i a ia mo te kororia,
- 24
- Ki a tatou, i karangatia nei e ia, ehara i te mea no nga Hurai anake, engari no nga tauiwi ano hoki?
- 25
- Ko tana kupu ano tena i ta Hohea, Ehara i te iwi noku, heoi ka karangatia e ahau Ko toku iwi; he wahine hoki e arohaina ana te wahine kihai i arohaina.
- 26
- A tenei ake i te wahi i korerotia ai ki a ratou, Ehara koutou i te iwi noku; ko reira ratou karangatia ai he tamariki na te Atua ora.
- 27
- Ta Ihaia karanga hoki mo Iharaira, Ahakoa i rite ki te onepu o te moana te tokomaha o nga tamariki a Iharaira, he toenga e ora:
- 28
- Na, e whakaotia e ia te mahi, e poroa hoki i runga i te tika: poro rawa hoki ta te Ariki mahi e mahi ai ki runga ki te whenua.
- 29
- Ko ta Ihaia ano ia i ki ai i mua, Me kahore te toe i te Atua o nga mano he whanau mo tatou, kua pera tatou me Horoma, kua rite ano hoki ki Komora.
- 30
- Na, kia pehea ta tatou korero? Ko nga tauiwi kihai nei i whai i te tika, kua mau i a ratou te tika, ara to te whakapono tika.
- 31
- Ko Iharaira ia, i whai nei i te ture o te tika, kahore i taea e ratou te ture o te tika.
- 32
- Na te aha? No te mea kihai ratou i ra runga i te whakapono, ra runga ke ana ratou i nga mahi o te ture. I tūtuki hoki o ratou waewae ki te kamaka tūtukinga;
- 33
- Ko te mea hoki ia i tuhituhia, Na, ka whakatakotoria e ahau ki Hiona he kamaka tūtukinga, he kohatu whakahinga: na, nga tāngata katoa e whakapono ana ki a ia e kore e whakama.
Address: 
Phone: 
Email: