- 1
- Na, kahore he whakahe inaianei mo te hunga i roto i a Karaiti Ihu, mo te hunga kahore nei e haere i runga i ta te kikokiko, engari i ta te Wairua.
- 2
- Na te ture hoki a te Wairua o te ora i roto i a Karaiti Ihu, ahau i atea ai i te ture o te hara, o te mate.
- 3
- Te mea hoki kihai i taea e te ture, i te ngoikore hoki o te kikokiko, tonoa mai ana e te Atua tana Tama, i te ahua o te kikokiko hara, mo te hara ano hoki, a whakahengia iho te hara i roto i te kikokiko:
- 4
- Kia rite ai to te ture tika i roto i a tatou, i te hunga kahore nei e haere i runga i ta te kikokiko, engari i ta te Wairua.
- 5
- Te hunga hoki i runga i ta te kikokiko, whakaaro ana ratou ki o te kikokiko; a he hunga no te Wairua, ki o te Wairua.
- 6
- To te whakaaro hoki ki te kikokiko he mate; to te whakaaro ia ki te Wairua he ora, he rangimarie.
- 7
- He tikanga whawhai hoki ki te Atua te whakaaro ki te kikokiko: e kore nei hoki e ngawari ki te ture a te Atua, kahore ano hoki e ahei kia ngawari.
- 8
- Na, e kore e taea e te hunga i to kikokiko te whakamanawareka ki te Atua.
- 9
- Na, kahore koutou i te kikokiko, engari i te Wairua, ki te mea e noho ana te Wairua o te Atua i roto i a koutou. Na, ki te kahore te Wairua o te Karaiti i tetahi, ehara tenei i a ia.
- 10
- Tena ki te mea kei roto a te Karaiti i a koutou, he tupapaku te tinana i te hara; he ora ia te wairua i te tika.
- 11
- Na, ki to noho i roto i a koutou te Wairua o te kai whakaara o Ihu i te mate, māna, ma te kai whakaara o te Karaiti i te mate, e whakaora o koutou tinana mate ki tona Wairua e noho na roto i a koutou.
- 12
- Na, e aku teina, kahore he rawa e tohe ai te kikokiko ki a tatou, kia noho i runga i ta te kikokiko.
- 13
- Ki te noho hoki koutou i runga i ta te kikokiko, tera koutou e mate: tena ki te mea ko te Wairua ta koutou hei whakamate i nga mahi o te tinana, ora koutou.
- 14
- Te hunga hoki e arahina ana e te Wairua o te Atua, he tamariki ratou na te Atua.
- 15
- He teka hoki he wairua pononga kua riro mai nei i a koutou, e mataku ai ano hoki koutou; engari kua riro i a koutou te Wairua whakatamariki, e karanga ai koutou, E Apa, e Pa.
- 16
- Ko taua Wairua ra ano hei whakaae ake ki o tatou wairua, he tamariki tatou na te Atua:
- 17
- A ki te mea he tamariki, mo tatou te kāinga; mo tatou te kāinga o te Atua, mo tatou tahi ko te Karaiti; ki te mate tahi tatou me ia, kia whakakororiatia ngatahitia ai hoki tatou.
- 18
- Ki taku whakaaro iho hoki, he kore noa iho nga mamae o tenei wa, ki te whakaritea ki te kororia e whakakitea mai ki runga ki a tatou a mua.
- 19
- Tumanako tonu nei hoki te mea i hanga, tatari tonu ki te whakakitenga mai o nga tamariki a te Atua.
- 20
- Kua oti hoki te tekateka noa te mea hei rangatira mo te mea i hanga, ehara i te mea na tenei te whakaae, engari na te kai whakarite, me te tumanako ano,
- 21
- Tera te mea hanga e whakaateatia mai i ta te pirau whakataurekarekatanga, whakarangatiratia ake ki roto ki te kororia o nga tamariki a te Atua.
- 22
- E mohio ana hoki tatou, kei te aue tahi, kei te mamae tahi, nga mea hanga katoa taea noatia tenei ra.
- 23
- Ehara i te mea ko ratou anake, ko tatou nei ano hoki kua whiwhi nei ki te hua matamua, ara ki te Wairua, ina e aue ana hoki tatou i roto i a tatou, e tatari ana ki te whakatamarikitanga, ara ki te whakarauoranga o o tatou tinana.
- 24
- Ka ora hoki tatou i a tatou ka tumanako atu nei: tena ka kitea te mea e tumanakotia atu ana, kore ake te tumanako: he aha hoki te tangata ka tumanako ai ki te mea kua kitea nei e ia?
- 25
- Na, ki te tumanako atu tatou ki te mea kahore nei e kitea, ka ata tāria marietia atu e tatou.
- 26
- Ko te Wairua ano hoki hei hoa mo tatou e ngoikore nei: kahore hoki tatou e mātau ki ta tatou e inoi ai kia tika: ko te Wairua nei ano ia te inoi ana mo tatou, ona aue e kore e taea te whakahua.
- 27
- A, te kai titiro i nga ngakau, e mohio ana ki te whakaaro o te Wairua, rite tonu hoki ki ta te Atua i pai ai tana inoi mo te hunga tapu.
- 28
- Na, e mātau nei tatou, kei te mahi tahi nga mea katoa i te pai mo te hunga e aroha ana ki te Atua, he mea karanga nei ratou i runga i tana i whakatakoto ai.
- 29
- Ko āna hoki i mohio ai i mua, i whakaritea ano e ia i mua kia rite ki te ahua o tana Tama, kia ai ia hei muanga i roto i nga teina tokomaha.
- 30
- A, āna i whakarite ai i mua, ko enei ano hoki i karangatia e ia: a, āna i karanga ai, ko enei ano hoki i whakatikaia e ia: a, āna i whakatika ai, ko enei ano i whakakororiatia e ia.
- 31
- Na, kia pehea ta tatou korero ki enei mea? Ki te mea ko te Atua hei hoa mo tatou, ko wai hei whawhai ki a tatou?
- 32
- Kihai nei i kaiponuhia e ia tana ake Tama, heoi tukua mai ana e ia mo tatou katoa, e kore ianei e tapiritia noatia mai e ia ki a ia nga mea katoa mo tatou?
- 33
- Ma wai e whakawa a te Atua i whiriwhiri ai? Ko te Atua hei whakatika.
- 34
- Ko wai hei whakahe? Ko te Karaiti i mate, ae ra hoki kua ara nei ano, a kei te ringa matou nei ia o te Atua, ko ia nei hoki kei te inoi mo tatou.
- 35
- Ma wai tatou e momotu ke i te aroha o te Karaiti? Ma to whakapawera, ma te rarunga, ma te whakatoi, ma te mate kai, ma te kakahu kore, ma te mate ka tata, ma te hoari ranei?
- 36
- Ko te mea hoki ia i tuhituhia, Na te whakaaro ki a koe matou i whakamatea ai i te ra roa nei; kiia ana matou hei hipi e patua ana.
- 37
- Engari i enei mea katoa nui atu te wikitoria i a tatou, he mea na te kai aroha i a tatou.
- 38
- U tonu hoki taku whakaaro, e kore te mate, e kore te ora, e kore nga anahera, e kore nga rangatira, e kore nga kaha, e kore nga mea, onaianei, e kore nga mea e puta mai a mua,
- 39
- E kore te tiketike, e kore te hohonu, e kore tetahi atu mea hanga, e kaha ki te momotu i a tatou i te aroha o te Atua, i tera i roto nei i a Karaiti Ihu i to tatou Ariki.
Address: 
Phone: 
Email: