- 1
- I anga ake ano oku kanohi, a ka titiro atu, na, ko tetahi tangata, he aho rūri i tona ringaringa.
- 2
- Na, ko taku meatanga atu, E haere ana koe ki hea? A ka mea mai ia ki a au, Ki te whangānga i a Hiruharama, kia kitea ai tona roa, tona whanui.
- 3
- Na, ko te haerenga atu o te anahera i korero ra ki a au, a ka puta mai ano tetahi anahera ki te whakatau i a ia.
- 4
- Na, ka ki mai tera ki a ia, Rere atu, ka korero atu ki te tamaiti nei, mea atu, Ka nohoia a Hiruharama, ka rite ki nga pa taiepa-kore, i te tini o te tangata, o nga kararehe i roto:
- 5
- A hei taiepa ahi ahau, e ai ta Ihowa, ki a ia, a karapoi noa; hei kororia ano hoki ahau i roto i a ia.
- 6
- Ou, ou, rere atu hoki i te whenua o te nota, e ai ta Ihowa; kua whakamararatia atu hoki koutou e ahau, ano ko nga hau e wha o te rangi, e ai ta Ihowa.
- 7
- E Hiona, whakaorangia koe, e koe e noho mai na korua ko te tamahine a Papurona.
- 8
- Ko te kupu hoki tenei a Ihowa o nga mano; No muri nei i te kororia kua ungā nei ahau e ia ki nga tauiwi i pahua na i a koutou; te tangata hoki e pa ana ki a koutou, e pa ana ki te whatupango o tona kanohi.
- 9
- Na, tenei ka ara toku ringa ki a ratou, a hei taonga pārau ratou ma a ratou pononga; a ka mohio koutou na Ihowa o nga mano ahau i unga mai.
- 10
- Waiata, kia koa, e te tamahine a Hiona: no te mea tenei au te haere atu nei, a ka noho ahau i roto i a koe, e ai ta Ihowa.
- 11
- A he maha nga iwi ka honoa ki a Ihowa i taua rangi, ko ratou hoki hei iwi moku, a ka noho ahau i roto i a koe, ka mohio hoki koe na Ihowa o nga mano ahau i unga mai ki a koe.
- 12
- Ka riro ano hoki i a Ihowa a Hura tona wahi tupu i runga i te whenua tapu, tera ano hoki ia ka whiriwhiri i a Hiruharama.
- 13
- Whakarongoa, e nga kikokiko katoa, i te aroaro o Ihowa: kua whakaohokia mai hoki ia i tona kāinga tapu.
Address: 
Phone: 
Email: