- 1
- Na, he poropiti teka ano i mua i roto i te iwi, he pera ano me nga kai whakaako teka e puta ake a mua i roto i a koutou; ma enei e mau puku mai nga titorehanga whakangaro, he whakakahore na ratou i te Ariki i hokona ai ratou, a he mea hohoro tonu te whakangaromanga e takina iho e ratou ki a ratou ano.
- 2
- He tokomaha ano hoki e aru i ta ratou tikanga taikaha; ma enei ano te ara o te pono ka korerotia kinotia ai.
- 3
- A i a ratou ka apo nei i te moni, ka titoa e ratou etahi kupu kia whai taonga ai ratou i a koutou: nonamata te tukunga mo ratou ki te hē, e kore ano e whakaroa; kahore hoki he moe o to ratou whakangaromanga.
- 4
- Na, kihai i tohungia e te Atua nga anahera i hara, engari peia ana ratou e ia ki te po, he mea herehere i te pouri, he mea tiaki mo te whakawakanga;
- 5
- A kihai i tohungia te ao tawhito, he mea tiaki ia nāna a Noa, te tokowaru, te kai kauwhau i te tika, i tana kawenga mai i te waipuke ki te ao o te hunga karakia kore;
- 6
- Nga pa ano hoki, a Horoma a Komora, meinga ana e ia hei pungarehu, hurihia iho, he mea whakawa, waiho iho hei tohu ki te hunga e noho karakia kore i nga wa i muri;
- 7
- Ko Rota ia ko te tangata tika whakaorangia ake e ia, i a ia e whakapouritia ana e te ritenga taikaha a te hunga kino;
- 8
- I taua tangata tika, e noho ana i roto i a ratou, mamae ana tona ngakau tika i a ratou mahi kino i tana i kite ai i tana i rongo ai, i tenei ra i tenei ra:
- 9
- Mātau tonu te Ariki ki te whakaora i te hunga karakia i roto i te whakama tautauranga, kia waiho ano hoki te hunga hē mo a te ra whakawa whiua ai:
- 10
- Tera rawa ia tana mo te hunga e whai ana i ta te kikokiko, e haere ana i runga i te hiahia poke, e whakahawea ana ki te rangatiratanga: he hunga hikaka, e whai ana i ta ratou ake; kahore hoki e wehi ki te korero kino ki nga tāngata nunui.
- 11
- Na, nga anahera he nui rawa nei te kaha te mana, kahore e puaki i enei he kupu kino mo ratou i te aroaro o te Ariki ina whakawa.
- 12
- Ko era ia, rite tonu ratou ki te kararehe kahore nei he whakaaro, he mea maori anake, i hangā nei hei hopukanga hei whakanga ro manga, korero kino ana ratou ki nga mea kahore nei e mohiotia e ratou; a ka ngaro i runga i ta ratou tikanga pirau;
- 13
- Ka whiwhi ratou ki te utu o te hē; ki ta ratou whakaaro iho he koanga ngakau ta te tinana whakaahuareka i te awatea. He ira ratou, he whakaheanga mai, e kai ana i nga mea papai i runga i a ratou mahi tinihanga i a ratou e hakari tahi ana me koutou;
- 14
- O ratou kanohi kī tonu i te puremu, kahore hoki e mutu to ratou hara; e poaina ana e ratou nga hinengaro kahore i u: he ngakau to ratou kua oti te whakamahi ki te apo; he tamariki kua oti te kanga:
- 15
- Mahue ake i a ratou te ara tika, kotiti ke ana ratou, whai tonu ai i te ara o Paraama tama a Pohora, i whakapai nei ki te utu o te hē;
- 16
- Otira i riria ano ia mo tana hē i korero te kararehe reo kore no te tangata nei ano te reo, a pēhia ana e ia te wairangitanga o te poropiti.
- 17
- He puna wai kore enei tāngata, he kapua e akina ana e te tūpuhi; pouri kerekere te wahi kua rite mo ratou, mo ake tonu atu.
- 18
- Tetere rawa hoki, he mea teka noa a ratou korero, e poaina ana e ratou ki nga hiahia o te kikokiko, ki nga hiahia taikaha, te hunga kua mawhiti rawa atu i roto i te hunga e noho ana i te hē.
- 19
- He here-kore ta ratou e whakaari nei ki a ratou, heoi he pononga ratou na te pirau: ki te taea hoki te tangata e te hoa riri, hei pononga ia mana.
- 20
- I a ratou hoki kua mawhiti mai i roto i nga mea poke o te ao, no te mea ka mātau nei ki te Ariki, ara ki te Kai whakaora ki a Ihu Karaiti, na, ki te mau ano ratou, a ka hinga rawa i aua mea, kino noa atu to ratou whakamutunga i te timatanga.
- 21
- Erangi hoki te kore e mātau ki te ara o te tika, he kino rawa ia te mātau, me te tahuri ke atu ano i te ture tapu kua tukua nei ki a ratou.
- 22
- Heoi te tukunga iho ki a ratou rite tonu ki ta te whakatauki pono, Kua hoki te kuri ki tona ruaki; me, Te poaka ano i horoia, ki tana titakatakanga i te paru.
Address: 
Phone: 
Email: