- 1
- Na, ka taua e Rawiri tona nuinga, a, whakaritea ana e ia he rangatira mano mo ratou, he rangatira rau.
- 2
- Katahi ka tonoa atu te iwi e Rawiri. I raro i te ringa o Ioapa, ko tetahi o nga ropu e toru; i raro i te ringa o Apihai tama a Teruia, teina o Ioapa, ko tetahi o nga ropu e toru; a, i raro i te ringa o Itai Kiti te tuatoru o nga ropu. A, i mea ano te kingi ki te iwi, Me haere tahi ano tatou.
- 3
- Na, ko te meatanga mai a te iwi, Kaua koe e puta ki waho; ki te rere hoki matou, e kore ratou e whai whakaaro ki a matou; ahakoa ko te hawhe o matou i mate, e kore ratou e whai whakaaro ki a matou: engari koe e rite ana ki nga mano kotahi tekau o matou; erangi rawa ko koe hei awhina ake mo matou i roto i te pa.
- 4
- Katahi te kingi ka mea ki a ratou, Me mea e ahau nga mea e pai ana ki ta koutou titiro. Na, tu ana te kingi ki te taha o te kuwaha, me te haere mai ano te iwi, ona rau, ona mano.
- 5
- A, i ako iho ano te kingi ki a Ioapa ratou ko Apihai, ko Itai, i mea, Mahara ki a au, kia ata hanga hoki ki taua tamaiti ki a Apoharama. A, i rongo katoa te iwi i te kingi e ako ana i nga rangatira katoa ki te tikanga mo Apoharama.
- 6
- Na, ko te putanga atu o te iwi ki te parae ki te tu i a Iharaira; a, i te ngahere o Eperaima te whawhaitanga.
- 7
- Na, patua iho i reira nga tangata o Iharaira e nga tangata a Rawiri, nui atu te parekura i reira i taua ra, e rua tekau nga mano.
- 8
- A, tohatoha noa atu i reira te whawhaitanga ki te mata katoa o te whenua: tokomaha atu o te iwi i pau i te ngahere i nga mea i pau i te hoari i taua ra.
- 9
- Na, ka tutaki a Apoharama ki nga tangata a Rawiri. A, i runga i te muera a Apoharama e noho ana. Na, ko te haerenga o te muera i raro i nga peka o tetahi oki nui. Kua mau tona mātenga ki te oki, a, tarewa ana ia i te takiwa o te rangi, o te whenua; haere atu ana te muera i raro i a ia.
- 10
- A, te kitenga o tetahi tangata, na, whakaaturia ana e ia ki a Ioapa; i mea hoki, Nana, i kite ahau i a Apoharama e iri ana i te oki.
- 11
- Na, ka mea a Ioapa ki taua tangata nāna nei i whakaatu mai ki a ia, Ha, i kite koe, a, he aha ia tē patua ai e koe i reira, tē pangā ai ki te whenua? penei tekau nga hekere hiriwa e hoatu e ahau ki a koe, me tetahi whitiki ano hoki.
- 12
- Na, ko te meatanga mai a taua tangata ki a Ioapa, Ahakoa i runga i toku ringa nga hiriwa kotahi mano pauna rawa, e kore e totoro atu toku ringa ki te tama a te kingi: i a tatou hoki e whakarongo ana i ako te kingi i a koe, i a Apihai, i a Itai, i mea, Kia tupato kei pa tetahi ki te tamaiti ra, ki a Apoharama.
- 13
- Penei kua mahi teka ahau, kua mea i te mate moku; e kore hoki tetahi mea e ngaro i te kingi; kua whakatika mai ano hoki koe ki a au.
- 14
- Na, ka mea a Ioapa, E kore e pai kia roa ahau nei i a koe, na, ka mau tona ringa ki etahi tao e toru, werohia atu ana e ia ki te ngakau a Apoharama, i a ia ano e ora ana i waenganui o te oki.
- 15
- Na, karapotia ana ia e nga taitamariki kotahi tekau, e nga kai mau o nga patu a Ioapa, a, patua ana a Apoharama e ratou, whakamatea ana.
- 16
- Na, whakatangihia ana e Ioapa te tētere, hoki ana te iwi i te whai i a Iharaira. Na Ioapa hoki i pehi te iwi.
- 17
- Na, ka mau ratou ki a Apoharama, a, makā ana e ratou ki roto ki tetahi poka nui i te ngahere, a, nui whakaharahara te puranga kohatu i haupuria e ratou ki runga ki a ia, a, whati ana a Iharaira katoa ki tona teneti, ki tona teneti.
- 18
- Na, i tona oranga i tikina e Apoharama i whakaarahia tetahi pou, tera i te raorao o te kingi; i mea hoki ia, Kahore aku tama e maharatia ai toku ingoa: na, karangatia iho e ia tona ingoa ki taua pou: a, e karangatia nei ano a reira, Ko te wahi o Apoharama, a, tae noa iho ki tenei ra.
- 19
- Na, ka mea a Ahimaata tama a Haroko, Kia rere ahau, ne? ki te korero ki te kingi ta Ihowa whakatikanga i tana whakawakanga i ona hoa riri.
- 20
- Na, ko te meatanga mai a Ioapa, E kore koe e kawe korero i tenei ra; engari me kawe korero koe i tetahi atu ra; i tenei ra ia e kore koe e kawe korero; kua mate hoki te tama a te kingi.
- 21
- Na ka mea a Ioapa ki a Kuhi, Haere, korerotia atu ki te kingi tau i kite ai. Na, ka piko iho a Kuhi ki a Ioapa, a rere ana.
- 22
- Na, ka mea ano hoki a Ahimaata tama a Haroko ki a Ioapa, a, tonoa ana He aha koa ra, kia rere ano hoki ahau i muri i a Kuhi. A ka mea a Ioapa, Kia rere koe hei aha, e taku tamaiti? kahore nei hoki he korero i rite māu.
- 23
- He aha koa ra, me rere ano ahau. Na, ka mea tera ki a ia, Rere. Na, rere ana a Ahimaata i te ara o te mānia, a mahue mai a Kuhi.
- 24
- Na, i te takiwa o nga kuwaha e rua a Rawiri e noho ana; na, haere ana te kai titiro ki te tuanui i runga i te kuwaha, ki te taiepa, a, te marangatanga ake o ona kanohi, ka titiro, na, ko tetahi tangata e rere mai ana, ko tona kotahi.
- 25
- Na, ka karanga mai te kai titiro, a ka whakaatu ki te kingi. Ano ra ko te kingi, Ki te mea ko ia anake, he korero kei tona mangai. Na, haere tonu mai ana tera, a ka tata.
- 26
- A, i kite ano te kai titiro i tetahi atu tangata e rere mai ana, a ka karanga iho te kai titiro ki te kai tiaki o te kuwaha, ka mea, Tera tangata e rere mai ra, ko ia anake. A ka mea te kingi, He korero ano ta tera.
- 27
- Na, ka mea te kai titiro, ki taku titiro atu, rite tonu te rere o te tuatahi ki te rere o Ahimaata tama a Haroko. A ka mea te kingi, He tangata pai ia, a, e haere mai ana me nga korero pai.
- 28
- Na, ka karanga mai a Ahimaata, a ka mea ki te kingi, E pai ana. Na, ka piko iho tona mata ki te whenua ki te aroaro o te kingi, a ka mea, Kia whakapaingia a Ihowa tou Atua, nāna nei i tuku mai nga tangata i totoro mai nei to ratou ringa ki toku ariki ki te kingi.
- 29
- Na, ka mea te kingi, Kei te pai ranei te tamaiti a Apoharama? Ano ra ko Ahimaata, I te tononga a Ioapa i te tangata a te kingi, i a au ano hoki, i to pononga, i kite ahau i te ngangau nui, heoi kihai i mohio he aha ranei.
- 30
- Na, ka mea te kingi ki a ia, Haere ake, ka tu ki konei. Na, haere atu ana ia, a, tu ana.
- 31
- Na, ko te haerenga mai o Kuhi; a ka mea a Kuhi, He korero, e toku ariki, e te kingi; kua whakatikaia hoki e Ihowa to whakawakanga i te hunga i whakatika mai ra ki a koe.
- 32
- Ano ra ko te kingi ki a Kuhi, Kei te pai ranei te tamaiti a Apoharama? A ka mea a Kuhi, Kia rite ki taua tamaiti nga hoa riri o toku ariki o te kingi, me te hunga katoa e whakatika mai ana ki a koe mo te kino.
- 33
- Na, oho pu te mauri o te kingi, a, piki ana ki te ruma i runga i te kuwaha, tangi ana: ko tana korero tenei i a ia e haere ana, E taku tamaiti, e Apoharama, e taku tamaiti, e taku tamaiti, e Apoharama! e pai me he mea ko ahau i mate, a kaua koe, e Apoharama, e taku tamaiti, e taku tamaiti.
Address: 
Phone: 
Email: