- 1
- I taua rangi ano i korerotia i roto i te pukapuka a Mohi me te whakarongo ano te iwi, a ka kitea te mea i tuhituhia ki reira kia kaua te Amoni me te Moapi e tapoko ki roto ki te whakaminenga a te Atua, a, ake ake;
- 2
- No te mea kihai i maua e ratou he taro, he wai, hei tukunga mai mo nga tamariki a Iharaira: na, utua ana e ratou a Paraama hei hoa riri mo ratou, hei kanga mo ratou: heoi whakaputaina ketia ake e to tatou Atua te kanga hei manaakitanga.
- 3
- Na, to ratou rongonga i te ture, ka wehea atu e ratou nga whakauru katoa i roto i a Iharaira.
- 4
- Na, i mua ake o tenei ko Eriahipi, tohunga, kai tiaki i te ruma o te whare o to tatou Atua, he whanaunga ano no Topia,
- 5
- Whakapaia ana e tenei he ruma nui mona, te wahi i reira nei i mua e rongoa ana nga whakahere toto-kore, te parakihe, nga oko, me te whakatekau o te witi, o te waina hou, o te hinu, te mea i kiia iho ma nga Riwaiti, ratou ko nga kai waiata ko nga kai tiaki tatau, me nga whakahere i nga tohunga.
- 6
- Na, i tenei katoa kahore ahau i Hiruharama; no te toru tekau ma rua nei hoki o nga tau o Arataherehe kingi o Papurona i tae atu ai ahau ki te kingi, a, maha noa nga rangi, ka whakaaetia mai ahau e te kingi.
- 7
- Na, taku taenga mai ki Hiruharama, taku mohiotanga ki te mea kino i mea ai a Eriahipi he whakaaro ki a Topia, i a ia i whakapai nei i tetahi ruma mona i nga marae o te whare o te Atua;
- 8
- Na, kino rawa ki a au; akiritia atu ana e ahau nga mea katoa o te whare o Topia i roto i taua ruma.
- 9
- Katahi ahau ka korero atu; a, purea ana e ratou nga ruma. Na, whakahokia atu ana e ahau ki reira nga oko o te whare o te Atua, nga whakahere toto-kore me te parakihe.
- 10
- A, i kite ano ahau kihai nga wahi ma nga Riwaiti i hoatu, na, oma ana ratou ki tāna mara, ki tāna mara, nga Riwaiti, nga kai waiata i mahia ai te mahi.
- 11
- Na, whawhaitia iho e ahau nga rangatira; i mea ano ahau, He aha i whakarerea ai te whare o te Atua? Na, huihuia mai ana ratou e ahau, whakaturia ana ki to ratou turanga.
- 12
- Na, kei te kawe mai ano a Hura katoa i nga whakatekau o te witi, o te waina hou, o te hinu, ki nga whare taonga.
- 13
- Na, aku i mea ai hei kai tiaki mo nga taonga, ko Heremia tohunga, ko Haroko karaipi, a, o nga Riwaiti, ko Peraia; i to ratou taha ko Hanana tama a Takuru tama a Matania: i kiia hoki ratou he hunga pono; a, ta ratou, he tuwha mea ma o ratou tuakana, teina.
- 14
- Kia mahara, e toku Atua, ki tenei mea aku, kaua hoki e horoia atu tenei tikanga pai aku i whakaputaina nei e ahau ki te whare o toku Atua, ki nga mahi titiro ano hoki o reira.
- 15
- I aua rangi ano ka kitea e ahau etahi i roto i a Hura e takahi ana i nga takahanga waina i te hapati, e kawe mai ana i nga paihere witi, e whakawaha ana i nga kaihe; me te waina ano, me nga karepe, me nga piki, me nga pikaunga katoa, he mea kawe mai na ratou ki Hiruharama i te ra o te hapati. Na, whakaaturia atu ana e ahau to ratou he i te ra i hoko ai ratou i te kai.
- 16
- I reira ano hoki e noho ana etahi tangata o Taira, he kai kawe mai i nga ika, i nga mea hoko katoa, a, hokona ana e ratou i te hapati ki nga tamariki o Hura, i roto ano hoki i Hiruharama.
- 17
- Na, whawhaitia iho e ahau nga rangatira o Hura. I mea ahau ki a ratou, He aha tenei mea kino e mea nei koutou, i a koutou ka whakapoke nei i te ra hapati?
- 18
- Kahore ianei o koutou mātua i penei, a, kawea mai ana e to tatou Atua tenei kino katoa ki runga ki a tatou, ki runga ano hoki i tenei pa? Na, ko koutou ano hei whakaneke ake i te riri mo Iharaira, i te mea ka whakapokea nei te hapati.
- 19
- Na, pouriuri kau nga kuwaha o Hiruharama i mua ake o te hapati, ka korerotia atu e ahau, a, tutakina ana e ratou nga kēti. I mea ano ahau kia kaua e whakatuwheratia, kia taka ra ano te hapati: i whakaturia ano e ahau etahi o aku tangata ki nga kuwaha, kei kawea mai ki roto he pikaunga i te ra o te hapati.
- 20
- Na, kotahi, e rua nga moenga o nga tangata i nga taonga, o nga kai hoko i nga tini mea i waho o Hiruharama.
- 21
- Katahi ahau ka whakaatu i to ratou he, a ka mea ki a ratou, He aha koutou i moe ai i te aronga o te taiepa? Ki te pena ano koutou, ka totoro atu toku ringa ki a koutou. No taua rangi ano i kore ai ta ratou haere mai i te hapati.
- 22
- I ki atu ano ahau ki nga Riwaiti kia purea ratou, kia haere mai hoki ratou ki te tiaki i nga kuwaha hei whakatapu mo te ra hapati. Maharatia ano tenei aku, e toku Atua; tohungia hoki ahau, kia rite ki te nui o to atawhai.
- 23
- I aua rangi ano ka kite ahau i etahi Hurai kei a ratou e noho ana etahi wahine no Aharoro, no Amona, no Moapa.
- 24
- A ratou tamariki ano hoki, tetahi wahi o te reo no Aharoro, kihai ratou i mohio ki to nga Hurai reo; heoi i rite ki te reo o tetahi iwi, o tetahi iwi.
- 25
- Na, whawhaitia iho ratou e ahau, kangā iho ratou e ahau, patua ana etahi o ratou, hutihutia ana o ratou makawe, whakaoatitia ana ratou e ahau ki te Atua, Kaua e hoatu ā koutou tamahine ki ā ratou tamariki, kaua ano hoki e tangohia mai ā ratou tamahine ma ā koutou tamariki, ma koutou ranei.
- 26
- He teka ianei na enei mea i hara ai a Horomona kingi o Iharaira? he maha nei nga iwi, heoi kahore o ratou kingi hei rite mona, he mea aroha nei ia na tona Atua, a, meinga ana e te Atua hei kingi mo Iharaira katoa: ko ia ano hoki i meinga e nga wahine ke kia hara.
- 27
- Na, me whakarongo ano ranei matou ki a koutou, me mahi katoa ranei tenei hē nui, me mahi tutū ranei ki to tatou Atua, me marena ranei nga wahine ke?
- 28
- Na, he hunaonga na Hanaparata Heroni tetahi o nga tama a Ioiara tama a Eriahipi a te tino tohunga; na, peia atu ana ia e ahau i toku taha.
- 29
- Kia mahara koe ki a ratou, e toku Atua, mo ratou i whakapoke i te tohungatanga, i te kawenata ano o te tohungatanga, o nga Riwaiti ano hoki.
- 30
- Na, kua ma ratou i a au i te poke o nga tangata ke, whakaritea ana hoki e au te mahi tiaki a nga tohunga, a nga Riwaiti, te mahi a tenei, a tenei,
- 31
- Me te tikanga ano mo te whakahere wahie i nga wa i whakaritea; mo nga matamua ano hoki. Maharatia mai ahau e toku Atua mo te pai.
Address: 
Phone: 
Email: