- 1
- Ha, he aha ra te pai i hua ki te Hurai? he aha te rawa o te kotinga?
- 2
- He nui ra i nga mea katoa: te tuatahi, kua oti te tuku ki a ratou nga kupu a te Atua.
- 3
- Tena iana, ki te mea kihai etahi i whakapono, e taka ranei to te Atua pono i to ratou whakapono kore?
- 4
- Kahore rapea: engari ko te Atua kia pono, a he teka kau nga tāngata katoa; ko te mea hoki ia i tuhituhia, Kia tika ai tau i to korerotanga, kia puta ai tau i tou whakawakanga.
- 5
- Ha, ki te mea na, to tatou hē i kitea nuitia ai to te Atua tika, me pehea he kupu ma tatou? E hē ana ranei te Atua, i a ia e whakapa ana i te riri? (he kupu tangata tenei naku:)
- 6
- Kahore rapea: penei ka pehea ta te Atua whakarite whakawa mo te ao?
- 7
- Na, ki te mea na taku teka i hira rawa ai to te Atua pono hei kororia mona; he aha ano hoki au i whakahengia ai me te mea he tangata hara?
- 8
- Tē ki ranei (ko te kupu whakapae teka tenei mo matou, ki ta etahi hoki ko ta matou kupu tenei,) Tatou ka mahi i te kino, kia puta ai he pai? tika tonu te whakahe mo ratou.
- 9
- He aha koia? ko matou te hunga pai? Kahore ra hoki: kua oti hoki te whakaatu e matou ko nga Hurai, ko nga Kariki, kei raro katoa i te hara;
- 10
- Ko te mea hoki ia i tuhituhia, Kahore he tangata tika, kahore kia kotahi:
- 11
- Kahore he tangata e mātau ana, kahore he tangata e rapu ana i te Atua.
- 12
- Kua peka ke ratou katoa, kua kino ngatahi; kahore he tangata e mahi ana i te pai, kahore kia kotahi.
- 13
- He urupa puare noa o ratou korokoro; e patipati ana o ratou arero; kei roto i o ratou ngutu te wai whakamate o nga nakahi:
- 14
- Kī tonu o ratou mangai i te kanga, i te nanakia:
- 15
- O ratou waewae, hohoro tonu ki te whakaheke toto:
- 16
- He whakangaromanga, he ngakau pouri, kei o ratou ara:
- 17
- Kahore hoki ratou i mohio ki te ara o te rangimarie:
- 18
- Kahore te wehi o te Atua i mua i o ratou kanohi.
- 19
- Na, e mātau ana tatou ki nga kupu a te ture, he mea korero ki te hunga i te ture: kia purua ai nga mangai katoa, kia to hē ai te ao katoa i te aroaro o te Atua.
- 20
- No te mea kahore he mahi o te ture e tika ai tetahi kikokiko i tona aroaro: ma te ture hoki ka mohiotia ai te hara.
- 21
- Otiia kua whakamaramatia i naianei te tika a te Atua, motu ke i te ture, he mea whakaatu mai na te ture, na nga poropiti;
- 22
- Ara te tika o te Atua e na runga mai ana i te whakapono ki a Ihu Karaiti, ki te hunga katoa mo te hunga katoa, e whakapono ana: kahore hoki he pokanga ketanga:
- 23
- Kua hara katoa hoki, kahore e taea e ratou te kororia o te Atua;
- 24
- He mea, whakatika utu kore na tona aroha noa, i runga i ta Karaiti Ihu hokonga:
- 25
- Ko ia hoki ta te Atua i whakaatu mai ai i mua hei whakamarietanga, i runga i te whakapono ki ona toto, kia whakakitea ai tana tika, i te mea ka whakapahemotia nei nga hara o mua, he mea hoki na to te Atua manawanui;
- 26
- Hei whakakite i tana tika i tenei wa nei ano: he mea hoki kia tika ai ia, me te whakatika ano i te tangata e whakapono ana ki a Ihu.
- 27
- Na, kei hea te whakamanamana? Kua araia atu. E tehea ture? e to nga mahi? Kahore: engari e te ture o te whakapono.
- 28
- Koia matou ka mea ai, kei te whakapono he tika mo te tangata, motu ke i nga mahi o te ture.
- 29
- Ko te Atua oti ia o nga Hurai anake? he teka ianei no nga tauiwi ano hoki? Ae ra, no nga tauiwi ano hoki:
- 30
- Kotahi nei hoki te Atua, māna e whakatika te kotinga i runga i te whakapono, me to kotinga kore ina whakapono.
- 31
- E taka ranei te ture i ta matou, ara i te whakapono? Kahore rapea: engari na ta matou i u ai te ture.
Address: 
Phone: 
Email: