- 1
- Te mohiotanga o Mororekai ki nga mea katoa i meatia, na, haehaea ana e Mororekai ona kakahu, kei te kakahu ia i te kakahu taratara, kei te mea ano hoki i te pungarehu ki a ia. Te tino haerenga ki waenganui o te pa, he nui, he tiwerawera te tangi.
- 2
- Na, haere ana ia ki mua i te kuwaha o te kingi; e kore hoki e ahei kia haere ki roto i te kuwaha o te kingi ki te mea he taratara te kakahu.
- 3
- I nga kawanatanga katoa ano hoki, i nga wahi i tae atu ai te kupu a te kingi me tana ture, nui atu te tangi a nga Hurai, te noho puku, te aue, me te uhunga: he tokomaha ano hoki he kakahu taratara to ratou whariki, he pungarehu.
- 4
- Na, kua tae mai nga kotiro a Ehetere, me ana rangatira ruma, kei te whakaatu ki a ia. Na, mamae whakaharahara te kuini. Hoatu ana e ia he kakahu kia kawea hei kakahu mo Mororekai, kia tangohia mai ano hoki ona kakahu taratara i a ia: heoi kihai ia i tango atu.
- 5
- Katahi a Ehetere ka karanga ki a Hataka, ki tetahi o nga rangatira ruma a te kingi i whakakitea nei e ia kia tu ki tona aroaro, a ka whakahau i a ia kia mohiotia nga mea a Mororekai, he aha ra tenei mea, na te aha hoki.
- 6
- Na, haere atu ana a Hataka ki a Mororekai ki te waharoa o te pa, ara, ki te aronga o te kuwaha o te kingi.
- 7
- A, whakaaturia mai ana ki a ia e Mororekai nga mea katoa i pa ki a ia, me te korero ano o te moni i kiia e Hamana kia paunatia e ia ki roto ki nga whare taonga o te kingi hei mea mo nga Hurai kia whakangaromia.
- 8
- I homai ano e ia ki a ia nga korero o te ture i tuhituhia, i homai nei i Huhana hei whakangaro mo ratou, a mana e whakakite atu ki a Ehetere, e whakaatu ki a ia, mana hoki ia e whakahau kia haere ki te kingi wawao ai; kia rapua hoki i tona aroaro he mea mo tona iwi.
- 9
- Na, haere mai ana a Hataka, whakaaturia mai ana e ia ki a Ehetere nga kupu a Mororekai;
- 10
- Na, ka korero ano a Ehetere ki a Hataka, a, whakahaua ana e ia ki a ia he kupu ki a Mororekai;
- 11
- E mohio ana nga tangata katoa a te kingi, me te iwi o nga kawanatanga o te kingi, Ko nga tangata katoa, ahakoa tane, ahakoa wahine, e haere mai ana ki to roto marae ki te kingi, i te mea kihai i karangatia, kotahi tonu tana ture, kia whakamatea, ki te kahore e torona mai e te kingi te hepeta koura ki a ia kia ora ai. Ko au ia, ka toru tekau enei ra oku kihai i karangatia kia haere atu ki te kingi.
- 12
- Na, korerotia atu ana e ratou ki a Mororekai nga kupu a Ehetere.
- 13
- Katahi a Mororekai ka ki atu kia wkakahokia tenei kupu ki a Ehetere, Kei mea koe kei roto koe i te whare o te kingi, a, e nui atu tou oranga i to nga Hurai katoa.
- 14
- Ki te wahangu rawa hoki koe, i tenei wa, tera e puta ake he tānga manawa, he whakaoranga mo nga Hurai i tetahi atu wahi. Na, ko koe, ko te whare ano hoki o tou pāpā, ka ngaro: ko wai hoki ka mohio hei mea pea mo te wa penei i tae ai koe ki te kingitanga?
- 15
- Na, ka ki atu a Ehetere kia whakahokia e ratou tenei kupu ki a Mororekai,
- 16
- Tikina, huihuia nga Hurai katoa e kitea ki Huhana, ka noho puku ai koutou, hei mea moku; kaua hoki e kai, kaua e inu, kia toru nga ra, i te po, i te ao. Ko matou ano ko aku kotiro ka noho puku ano; ko reira ahau haere atu ai ki te kingi; he mea kahore nei e rite ki te ture. A, ki te mea ka hunā ahau, ka hunā ahau.
- 17
- Na, haere ana a Mororekai, meatia ana e ia nga mea katoa i whakahaua mai ki a ia e Ehetere.
Address: 
Phone: 
Email: