Esther Chapter 5 - Paipera Tapu 1868 | Te Paipera Tapu 1868

Esther Chapter 5 - Paipera Tapu 1868

1
Na, i te toru o nga ra ka kakahuria ona kakahu kuini e Ehetere, a, tu ana i to roto marae i te whare o te kingi, i te ritenga atu ano o te whare o te kingi; ko te kingi hoki e noho ana i runga i te torona o tona kingitanga i te whare kingi, i te ritenga mai ano o te tatau o te whare.
2
A, te kitenga o te kingi i a Ehetere i te kuini e tu ana i te marae, ka manakohia mai ia e ia, a ka torona mai e te kingi te hepeta koura i tona ringa ki a Ehetere. Na, ka whakatata atu a Ehetere, a ka pa atu ki te pito o te hepeta.
3
Na, ko te meatanga mai a te kingi ki a ia, He aha to mea, e te kuini, Ehetere? he aha hoki te me e tonoa nei e koe? ahakoa ko te hawhe o te kingitanga, ka hoatu ki a koe.
4
Ano ra ko Ehetere, Ki te mea e pai ana ki ta te kingi, kia haere mai te kingi raua ko Hamana aianei ki te hakari kua oti i a au te taka mana.
5
Ano ra ko te kingi, Whakahohorotia a Hamana e koutou kia meatia ai e ia ta Ehetere i ki ai. Na, haere ana te kingi raua ko Hamana ki te hakari kua oti nei te taka e Ehetere.
6
A, i ki atu ano te kingi ki a Ehetere i te mea e inu waina ana, He aha tau e mea nei mau? ka hoatu ano ki a koe: he aha hoki tau e tono nei? Ahakoa ko te hawhe o te kingitanga, ka meatia.
7
Na, ko te whakahokinga mai a Ehetere, ka mea, Taku i mea ai maku, taku i tono ai,
8
Ki te mea kua manakohia mai ahau e te kingi, ki te mea e pai ana ki ta te kingi kia homai taku i mea ai maku, kia meatia taku i tono ai, kia haere mai te kingi raua ko Hamana ki te hakari e takā e ahau ma raua; a, apopo ka whakaritea e ahau te kupu a te kingi.
9
Na, puta mai ana a Hamana i taua rangi, koa ana, pai ana te ngakau. Heoi te kitenga o Hamana i a Mororekai i te kuwaha o te kingi, a kihai tera i whakatika, i oraora ki a ia, na, ki tonu a Hamana i te riri ki a Mororekai.
10
Otiia i whakamanawanui ano a Hamana; te taenga atu ki tona whare, ka tono tangata atu ia ki te tiki i ona hoa, ratou ko tana wahine ko Herehe.
11
A, korerotia atu ana e Hamana ki a ratou te kororia o ona taonga, te tokomaha o ana tamariki, me a te kingi whakanuinga katoatanga i a ia, me tana whakanekehanga i a ia ki runga ake i nga rangatira, i nga tangata a te kingi.
12
I mea ano a Hamana, He pono kihai tetahi i tukua atu e te kuini e Ehetere hei hoa mo te kingi ki te hakari i takā e ia ko ahau anake; kua kiia mai ano hoki ahau hei hoa atu mo te kingi ki a ia apopo.
13
Heoi kahore he pai o tenei katoa ki a au i nga wa katoa e kite ai ahau i te Hurai i a Mororekai e noho ana i te kuwaha o te kingi.
14
Na, ko te kianga mai a tana wahine a Herehe, ratou ko ona hoa katoa ki a ia, Kia hangā he tarawa, kia rima tekau nga whatianga te tiketike, a, i te ata māu e ki atu ki te kingi kia taronatia a Mororekai ki runga; katahi koe ka koa, a ka haere tahi korua ko te kingi ki te hakari. Na, pai tonu taua kupu ki a Hamana, a ka meinga e ia kia hangā taua tarawa.