Esther Chapter 7 - Paipera Tapu 1868 | Te Paipera Tapu 1868

Esther Chapter 7 - Paipera Tapu 1868

1
Na, kua tae mai te kingi raua ko Hamana ki te hakari, ki te kuini iti a Ehetere.
2
A ka mea mai ano te kingi ki a Ehetere i te rua o nga ra, i te mea e waina ana, He aha tau e mea nei mau, e Kuini Ehetere? Ka hoatu hoki ki a koe. He aha hoki tau e tono ai? Ahakoa ko te hawhe o te kingitanga, ka meatia.
3
Na, ko te whakahokinga mai a Kuini Ehetere, ka mea, Ki te mea kua manakohia mai ahau e koe, e te kingi, a ki te mea e pai ana ki ta te kingi; taku e mea ai maku, ko ahau kia whakaorangia; taku e tono nei maku, ko toku iwi.
4
Kua oti hoki matou, ahau me toku iwi, te hoko kia whakangaromia, kia patua, kia hunā. Na, me i hokona matou hei pononga tane, hei pononga wahine, kua whakarongo puku ahau: e kore ano ia e rite i te hoa riri nga mea a te kingi ka maumauria nei.
5
Na, ka utua mai e Kingi Ahahueruha, ka mea ki a Kuini Ehetere, Ko wai ra? Kei hea ra te tangata i poka noa nei tona ngakau ki te mea i tenei mea?
6
Ano ra ko Ehetere, Te hoa riri, te hoa whawhai, ko tenei Hamana kino nei. Na, mataku ana a Hamana i te aroaro o te kingi raua ko te kuini.
7
Na, whakatika ana te kingi, i te inumanga waina, he riri hoki nona, a haere ana ki te kāri o te whare. Ko Hamana ano hoki, tu tonu ki te inoi ki a Kuini Ehetere mona kia whakaorangia: i kite hoki ia kua takoto te he mona i te kingi.
8
Na, te hokinga mai o te kingi i te kari o te whare ki te whare inu waina, ko Hamana kua takoto ki runga ki te takotoranga o Ehetere. Na, ko te meatanga ake a te kingi, E takotoria ano ranei e ia te kuini i toku aroaro i te whare? Te putanga mai o te kupu i te mangai o te kingi, ka hipokina e ratou te mata o Hamana.
9
Na, ko te meatanga mai a Harapona a tetahi o nga rangatira ruma i te aroaro o te kingi, Tera ano hoki te tarawa e rima tekau nga whatianga te tiketike, he mea i hangā e Hamana mo Mororekai, (nana nei te kupu pai mo nga mea a te kingi,) te tu na i te whare o Hamana. Ano ra ko te kingi, Taronatia ia ki runga.
10
Na, taronatia ana e ratou a Hamana ki runga ki te tarawa i oti ra i a ia mo Mororekai, a ka mariri iho te riri a te kingi.