- 1
- I taua ra ano ka homai e te kingi e Ahahueruha ki a Kuini Ehetere te whare o Hamana, o te hoa riri o nga Hurai. A ka haere mai a Mororekai ki te aroaro o te kingi, na Ehetere hoki i whakaatu he whanaunga ia nona.
- 2
- I unuhia ano hoki e te kingi tona mowhiti i tangohia mai nei e ia i a Hamana, a, hoatu ana ki a Mororekai; a, i whakanohoia ano a Mororekai e Ehetere ki te whare o Hamana,
- 3
- A, i korero ano a Ehetere ki te aroaro o te kingi, me te takoto ano ia ki ona waewae, me te tangi ano, i inoi ki a ia kia karohia atu te kino a Hamana Akaki, me te whakaaro i whakaaro ai ia mo nga Hurai.
- 4
- Katahi ka torona mai te hepeta koura e te kingi ki a Ehetere; a ka whakatika a Ehetere, ka tu ki te aroaro o te kingi.
- 5
- Na, ko tana meatanga atu, Ki te mea e pai ana ki te kingi, ki te mea ano hoki e manakohia mai ana ahau e ia, ki te mea e tika ana tenei mea ki ta te kingi whakaaro, ki te mea e pai ana ahau ki tana titiro mai, me tuhituhi atu kia whakatakā nga pukapuka i whakaaroa e Hamana tama a Hamerata Akaki, ana i tuhituhi ai kia hunā nga Hurai i nga kawanatanga katoa a te kingi.
- 6
- Me pehea hoki e ahei ai ahau te titiro atu ki te he e pa mai ana ki toku iwi? me pehea hoki e ahei ai ahau te titiro atu ki te hunanga o oku whanaunga?
- 7
- Ano ra ko Kingi Ahahueruha ki a Kuini Ehetere raua ko Mororekai Hurai, Nana, kua oti te hoatu e ahau ki a Ehetere te whare o Hamana; kua oti ano tera te tarona ki runga ki te rakau mo tona ringa i totoro mai ki nga Hurai.
- 8
- Ma korua ano e tuhituhi ta korua i kite ai e pai ana mo nga Hurai, i runga i te ingoa o te kingi, hīri rawa ki te mowhiti o te kingi: he tuhituhi hoki i tuhituhia i runga i te ingoa o te kingi, i hīritia ki te mowhiti o te kingi, e kore e whakatakā.
- 9
- Katahi ka karangatia nga karaipi o te kingi i taua wa i te toru o nga marama, ara, i a Marama Hiwana, i te rua tekau ma toru o nga ra, a ka tuhituhia nga mea katoa i whakahau ai a Mororekai ki nga Hurai, ki nga kawana, ratou ko nga kawana iti, ko nga rangatira ano o nga kawanatanga, o Inia mai ano, a tae noa ki Etiopia, kotahi rau e rua tekau ma whitu nga kawanatanga; ki tenei kawanatanga, ki tenei kawanatanga, he mea whakarite tonu ki ta ratou tuhituhi; ki tenei iwi, ki tenei iwi, he mea whakarite ano ki to ratou reo; ki nga Hurai ano hoki, he mea whakarite ki ta ratou tuhituhi, ki to ratou reo.
- 10
- Tuhituhi ana ia i runga i te ingoa o Kingi Ahahueruha, hīri rawa ki te mowhiti o te kingi, ungā ana e ia nga pukapuka kia maua e nga kai kawe pukapuka i runga i nga hoiho, e nga tangata ano e wahā ana e nga muera, e nga kamera, e nga kuao o nga kamera tere.
- 11
- A, i roto i enei ta te kingi tukunga atu i nga Hurai o nga pa katoa kia huihui, kia tu ki runga, kia ora ai ratou, kia whakangaro, kia patu, kia huna i nga ope katoa o te iwi o te kawanatanga e tauria ai ratou, nga kohungahunga, nga wahine; a, ko o ratou taonga ano kia pahuatia,
- 12
- I te rangi kotahi ano, i nga kawanatanga katoa o Kingi Ahahueruha, i te tekau ma toru ano o nga ra o te tekau ma rua o nga marama, ara, o Marama Arara.
- 13
- I whakapuakina ki nga iwi katoa, nga kupu i tuhituhia mo te ture kia whakatakotoria i nga kawanatanga katoa, he mea, kia hihiko ai nga Hurai i taua rangi ki te rapu utu i o ratou hoa riri.
- 14
- Haere ana nga kai kawe pukapuka, he mea waha e nga muera, e nga kamera, he mea whakatatutatu, he mea whakahohoro e te kupu a te kingi. A, homai ano te ture i Huhana i te whare kingi.
- 15
- Na, haere mai ana a Mororekai i te aroaro o te kingi, tona kakahu, ko to te kingi, he pūru, he ma, he nui ano hoki te karauna koura, tetahi kakahu hoki he rinena pai, he papura. Na, koa ana, hari ana te pa a Huhana.
- 16
- He māramatanga ano hoki to nga Hurai, he hari, he koa, he honore.
- 17
- I nga kawanatanga katoa ano hoki, i nga pa katoa ano hoki, i nga wahi i tae atu ai te kupu a te kingi me tana ture, he hari, he koa to nga Hurai, he kai hakari, he rangi pai. He tokomaha ano hoki o nga iwi o te whenua i whaka-hurai; i tau hoki te wehi o nga Hurai ki runga i a ratou.
Address: 
Phone: 
Email: