Song Of Solomon Chapter 2 - Paipera Tapu 1868 | Te Paipera Tapu 1868

Song Of Solomon Chapter 2 - Paipera Tapu 1868

1
He puawai ahau no Harono, he renga- renga no nga awaawa.
2
Rite tonu ki te rengarenga i roto i nga tataramoa taku e aroha nei i roto i nga tamahine.
3
Rite tonu ki te aporo i roto i nga rakau o te ngahere taku e aroha nei i roto i nga tamariki; ahuareka tonu ki a au te noho i raro i tona taumarumarunga iho; reka tonu hoki ona hua ki toku ngao.
4
I kawea atu ahau e ia ki tona whare waina, tona kara ano hoki i runga i a au he aroha.
5
Whakakahangia ake ahau ki nga kapa waina, whakahauorangia ahau ki nga aporo; e mate ana hoki ahau i te aroha.
6
Kei raro i toku mahunga tona maui, e awhi ana tona matau i a au.
7
He tohe tenei naku ki a koutou, e nga tamahine o Hiruharama, i te aroaro ano o nga aneterope, o nga hāta o te parae, kaua e whakaohokia, kaua e whakaarahia taku e aroha nei, a kia pai ra ano ia.
8
Te reo ra o taku e aroha nei! Nana, te haere nei ia, e tupekepeke ana i runga i nga maunga, e mokowhiti ana i runga i nga pukepuke.
9
Rite tonu taku e aroha nei ki te aneterope, ki te kuao hāta ranei: tenei ia te tu mai nei i tera taha o to matou taiepa, e matakitaki mai ana i nga matapihi, ano he puawai i roto i te mea ripekapeka.
10
I korero mai taku e aroha nei, i mea mai ki a au, E ara, e taku hoa, e taku mea ataahua, haere mai hoki.
11
Kua pahemo nei hoki te hotoke, kua mao, kua kore te ua;
12
Kua puta nga puawai ki runga ki te whenua, kua tata te wa e korihi ai nga manu, a e rangona ana te reo o te kukupa ki to tatou whenua.
13
Kua kopuku nga hua hou o te piki, a e kakara mai ana nga waina, me o ratou karepe hou. Maranga, e taku hoa, e taku mea ataahua, haere mai hoki.
14
E taku kukupa i roto i nga kapiti o te kamaka, i te wahi ngaro o te pikitanga, kia kite ahau i tou ahua, kia rongo ahau i tou reo; he reka hoki tou reo, he ataahua tou ahua.
15
Hopukia mai ma taua nga pokiha, nga pokiha iti e kino ai a taua waina; he karepe hou hoki kei a taua waina.
16
Kei a au taku e aroha nei, kei a ia ano hoki ahau: e whangai ana ia i roto i nga rengarenga.
17
I te mea kiano i whai hau noa te ra, a kiano i rere noa nga atarangi, tahuri mai, e taku e aroha nei; kia rite ki te aneterope, ki te kuao hāta, i runga i nga maunga o Petere.